Reediziun da «La rumur dal flüm»

| Fr, 16. Sep. 2011

Dal 1999 ha publichà Oscar Peer il roman «La rumur dal flüm» chi cuntegna elemaints autobiografics. Uossa cumpara pro la Chasa Editura Rumantscha üna versiun cha’l scriptur ha reelavurà.

Oscar Peer appartegna pro’ls plü importants autuors rumantschs. Da l’on 1999 es cumparü seis roman «La rumur dal flüm» chi descriva la vita in Engiadina i’ls ons 1930 e 1940. Duos ons plü tard es cumparüda la traducziun francesa «La rumeur du fleuve» e dal 2007 la versiun tudais-cha «Das Raunen des Flusses». Uossa preschainta la Chasa Editura Rumantscha (CER) la reediziun da la versiun rumantscha: «I nu’s tratta simplamaing dad üna restampa da la prüma versiun da la ’Rumur dal flüm’», declera Anita Decurtins-Capaul da la CER, «i’s tratta blerant dad üna versiun cha l’autur Oscar Peer ha reelavurà e chi cuntegna uschea interessants nouvs detagls.»

In tschercha da fastizis d’infanzia
Oscar Peer es nat l’on 1928 a Lavin ed ha frequentà qua ed a Zernez la scoula populara. A Cuoira ha’l frequentà il Seminari da magisters ed ha Turich e Paris ha’l stübgià romanistica. «La rumur dal flüm» descriva las differentas staziuns da la vita cha l’autur ha passantà in Engiadina Bassa. Las bleras persunas han existi, il cudesch nu tratta però be reminiscenzas da la famiglia Peer. L’autur descriva eir la vita i’ls ons trenta in Engiadina e l’influenza da la Seguonda Guerra mundiala. Chi saja partecipada natüralmaing eir la fantasia, disch Peer, «ella cumpletta ed invainta. Realtà e fantasia as dan il man.» Intant cha sias otras ouvras sun plütöst da taimpra dramatica es quist cudesch bainquant plü epic. 

«Ün’ouvra as sviluppa e crescha»
Las müdadas da quista reediziun as zoppan illa lingua, illas singulas frasas. Oscar Peer ha müdà bleras fuormas dal temp, dal preschaint i’l passà: «Eu vaiva adüna il sentimaint cha la fuorma dal passà nu funcziuna bain in rumantsch, ma lura n’haja senti cha quista fuorma mancaiva.» Ultra da quai ha’l eliminà passaschas ed agiunt per la paja nouvas episodas, sco per exaimpel la relaziun dal bap culs aviöls. Nu d’eira l’ouvra dimena fin uossa amo cumpletta? «Bain», respuonda l’autur, «però ün’ouvra as sviluppa e crescha, sco l’uman eir. Culla lavur naschan nouvs aspets.» Davo la publicaziun da la prüma versiun dal cudesch manaiva la memoria dad Oscar Peer adüna darcheu nanpro reminiscenzas chi til paraivan interessantas ed importantas. «Uschea es l’intera ouvra ün svilup da l’algordanza ed üna fuorma da progressiun», conclüda il scriptur.

Autor: ANR

Neuen Kommentar schreiben

CAPTCHA
Diese Frage soll automatisierten Spam verhindern und überprüft, ob Sie ein menschlicher Besucher sind

KOMMENDE EVENTS

STELLEN

IMMOBILIEN

DIVERSES