Adonta cha’l gir litterar vess cumanzà cul poet Peider Lansel al pè da la baselgia San Peider nun ha gnü Sonch Peider ingüna cumpaschiun cun seis schenschs e nun ha pisserà per üna situaziun meteorologica adattada a l’arrandschamaint. Impè da la spassegiada tras cumün s’haja decis da far il gir litterar in sala cumünala.<br /><br /><strong>Ils poets da renom</strong><br />L’idea da las bibliotecaras da Sent es statta da preleger in differents lös in cumün poesias o texts d’auturas ed autuors chi han vivü o vivan amo a Sent. Üna part da l’itinerari es statta dedichada als poets barmörs Peider Lansel, Armon Planta, Chasper Po, Andri Peer, Victor Stupan, Aita Stricker e Cla Biert. Tuottas quistas persunalitats s’han ingaschadas fermamaing a favur da lingua e cultura rumantscha e lur nom es, plü o main ferm, collià cul cumün da Sent. Intant cha Lansel e Peer sun stats poets pelplü serius nu s’ha Po bod mâ tut serius ed ha in prüma lingia giovà culla lingua. Planta percunter ha dovrà suvent la poesia per render attent a problems politics e da l’ambiaint. Quai ha fat eir Victor Stupan, ma da maniera plü dezainta. Aita Stricker ha trattà in sias poesias differentas situaziuns dal minchadi e Cla Biert ha descrit seis prüms inscunters culs «asens». Las persunas (per gronda part paraintas) chi han prelet las poesias ed ils texts da quists auturs han rendü attent als differents tuns chi van da la lirica sur l’umur e l’ironia fin pro la satira mordainta. L’ultima etappa vess gnü d’avair lö i’l vegl sunteri sper la baselgia cun l’intenziun da render omagi a ravarenda Jon Grand ed a Chasper Sarott. Tuots duos han scrit tanter oter numerus texts rumantschs pel vegl e pel nouv coral.<br /><br /><strong>Autuors actuals</strong><br />Da quista gruppa fan part la famiglia Stupan (Niculin Stupan e sias duos figlias Madlaina Rauch ed Aita Dermont) e Memma Etter da lingua rumantscha sco eir Angelika Overath, Manfred Koch e Nicola Bardola da lingua tudais-cha. Pro quists auturs ha pudü il public, üna settantina da persunas, dudir poesias umuristicas, texts da taimpra lirica, algordanzas d’infanzia ed experienzas da cumünanza e da prüm contact cul rumantsch sco lingua estra. Plü d’üna jada s’haja pudü rier da cour, impustüt las staintas da Manfred Koch sco trenader rumantsch da ballapè han provochà risadas.<br /><br /><strong>Broschüra da giubileum</strong><br />A la fin dal gir litterar ha preschantà Leta Mosca-Gaudenz la gronda surpraisa. In collavuraziun culla gruppa da bibliotecaras ha cumpilà Cla Rauch ün cudesch da giubileum chi cuntegna contribuziuns da 35 autuors da Sent. Sper quists texts chi van dal 1652 al 2011 as poja leger las ponderaziuns da las bibliotecaras a reguard la lectüra e l’importanza dal cudesch. Quista broschüra, cha mincha Sentiner stuvess avair sün sia maisina da not, as poja retrar a Sent pro la biblioteca cumünala.<br /><br /><strong>Visita da persunalità da renom</strong><br />Dumengia avantmezdi ha gnü lö üna matinada cun Hans Magnus Enzensberger. Illa sala cumünala s’ha radunada üna gronda cumpagnia per tadlar al cuntschaint autur tudais-ch chi ha prelet da sias poesias. L’autura Angelika Overath ha moderà il discuors cun quista persunalità ingaschada chi nun ha mâ esità da far palais sias opiniuns politicas. Tenor Enzensberger sto il poet e scriptur far dudir sia vusch, pustüt sch’ella es critica invers la cumünanza d’hozindi.<br />Autor: ANR