«Fintant cha las impostas nu vegnan plü otas e las otras indemnisaziuns cha nus vain da pajar regularmaing nu’s müdan, esa bain listess scha’ls cumüns Guarda, Lavin, Susch e Zernez fusiuneschan», ha manià üna duonna indigena da Zernez davo la radunanza d’infuormaziun a Zernez. Cun quist’expressiun ha ella dit precis quai chi occupaiva il plü ferm a las bundant 100 persunas preschaintas in chasa da scoula da Zernez. Sper il pè d’imposta chi gniss fixà pel nouv cumün e la contribuziun davart dal Chantun ha be amo il nom ventur dals cumüns fusiunats dat andit a discussiuns. <br />&#0160;<br /><strong>Fa üna fusiun propcha dabsögn?</strong><br />Tant Zernez sco eir Susch, Lavin e Guarda sun cumüns chi nu stan mal da finanzas. Il pè d’imposta dals quatter cumüns as rechatta tanter 84 pertschient (Zernez) e 100 pertschient (Guarda). Perquai chi nu’s müdess bler in quels reguards davo üna fusiun as dumondan blers scha quella fa insomma sen. «Insembel s’esa simplamaing plü ferm e s’ha daplü influenza», ha argumentà Tino Zanetti, il manader dal proget da fusiun dals quatter cumüns surmanzunats. Ultra da quai as possan ils quatter cumüns posiziunar amo plü bain sco center da l’Engiadina. «I s’ha lura daplü forza vers&#0160; insü, vers l’Engiadin’Ota sco eir vers ingiò, vers l’Engiadina Bassa», ha’l manià. Da quel avis sun stats eir ils votants chi han tut il pled in chasa da scoula da Zernez. «Schi nu s’ha dischavantags,&#0160; perche nu’s dessa avair il curaschi d’inchaminar alch nouv chi fa sen?», ha tunà ün appel. «Scha nus fusiunain nu vaina da fusiunar cun Scuol o San Murezzan», ha manià ün’otra persuna.<br />Ün zich daplü discussiun ha chaschunà la dumonda sco cha’l nouv cumün vess d’avair nom. «Üna fusiun vain per mai be in dumonda scha’l cumün fusiunà ha lura nom Zernez», ha argumentà ün vaschin da Zernez. Da quel avis sun stattas eir otras persunas e quai na be da quellas da Zernez. Chi saja bain evidaint cha davo la fusiun dess il nouv cumün surtour il nom dal plü grond cumün. Cha Zernez saja cuntschaint – impustüt grazcha al Parc Naziunal Svizzer – e chi’s fess daplü don co nüz cun müdar il nom. <br /><br /><strong>Critichà chi mancan detagls </strong><br />A Tino Zanetti, il manader dal proget da la fusiun dals quatter cumüns, ed ad Emil Müller, il president da la cumischiun da lavur da la fusiun previsa, sun gnüts fats rimprovers d’avair organisà la saira d’infuormaziun sainza preschantar blers detagls. Impustüt il fat chi nu’s sa intant amo che contribuziun cha’l Chantun paja per la fusiun ha dat andit a discussiuns. «Quist es la prüma sairada publica cha nus organisain e quella dess infuormar che chi’d es gnü fat fin uossa e co cha nus prevezzain da proseguir», han argumentà els duos. Cha schi gnian uossa fingià preschantadas cifras, possan quellas gnir interpretadas fos e pisserar in seguit per dischillusiuns o confusiuns. Tscherts votants vessan gugent dudi amo oters detagls sco per exaimpel chi chi lavura lura ingio, co cha decasteris e.u.i. vegnan scumpartits e reglats, che chi capita cun ledschas cumünalas existentas o eir che chi capita cul cumün da vaschins? «Nus prevezzain d’edir e scumpartir in mincha chasada pel cumanzamaint dal 2012 üna broschüra chi declera tuot ils detagls», ha dit Tino Zanetti. Ch’in seguit a quella broschüra as possa lura danövmaing s’inscuntrar per discuter detagls.<br />Autor: ANR