L’on passà da prümavaira han decis las quatter suprastanzas cumünalas da Zernez, Susch, Lavin e Guarda da lantschar il proget da fusiun. Ellas han tscherchà consulents externs chi accumpognan la fusiun: Ils büros fiduziaris Zanetti e partenaris ad Igis e Lischana Fiduziari a Scuol fuorman üna cumünanza da lavur. Il collavuratur es Marcel Franziscus, il manader es Tino Zanetti. «Ün proget da fusiun ha la lezcha da muossar in che direcziun chi pudess ir e co cha l’organisaziun politica e l’operativa as pudess preschantar», declera Zanetti. «I nu’s po però fingià sclerir in detagl tuot las dumondas in chosa, la realisaziun da la fusiun es lura il prossem pass». In üna prüma sezzüda han ils respunsabels fixà l’organisaziun dal proget. <br /><br /><strong>Fuormà üna gruppa da proget </strong><br />La respunsabiltà principala han las radunanzas cumünalas, las qualas decidan plü tard eir schi sun perinclettas culla fusiun sco propuonü o na. La gruppa da proget consista da la presidenta cumünala da Guarda Maria Morell e da seis collegas Linard Martinelli da Lavin, Emil Müller da Susch e René Hohenegger da Zernez. Pels cumüns da Susch, Guarda e Lavin chi han üna chanzlia cumünaivla fa part da la gruppa da proget eir il chanzlist Robert Cantieni e per Zernez il chanzlist Corsin Scandella e Roland Rodigari chi maina la gestiun tecnica dal cumün. Il protocol maina Danja Brunies. «La gruppa da proget es gnüda divisa in plüssas gruppas da lavur chi s’occupan da differents puncts da la fusiun», explichescha Tino Zanetti, «quistas gruppas han p.ex. ramassà üna blerüra da datas chi servan a far üna sort inventar, che posseda mincha cumün, terrain, infrastructura, god etc.» La gruppa da lavur ha lura skizzà fuormas pussiblas per l’organisaziun politica ed operativa. Ella s’ha eir occupada da las corporaziuns chi existan tanter ils quatter cumüns. <br /><br /><strong>Contrats da lavur vegnan surtuts</strong><br />Las corporaziuns chi existan tanter singuls cumüns staran, sco ch’el disch, gnir regladas da nouv: «Scholta gnarà p.ex. la chanzlia cumünala da Lavin, Guarda e Susch». La corporaziun da scoula ’A fin Z’ cumpiglia las scolaras e scolars dals cumüns dad Ardez fin Zernez: «No vain infuormà als dad Ardez cha schi detta la fusiun dals quatter cumüns schi cha’l nouv cumün fusiunà ed Ardez hajan da far üna cunvegna». La gestiun da la scoula cumünaivla restess tenor el precis medemma sco uossa. Da tscherchar üna soluziun s’haja eir in quai chi reguarda ils gods. Actualmaing esa uschea cha’l revier forestal Macun cumpiglia ils gods dals cumüns da Ftan, Tarasp, Ardez, Guarda, Lavin e Susch. Zernez ha ün agen revier forestal. Chi’s saja uossa landervia ad analisar las pussibiltats chi existissan in quai chi reguarda üna nouva fuorma da collavuraziun forestala. Per conclüder intuna Tino Zanetti cha’ls contrats da lavur cumünals nu sajan periclitats dad üna eventuala fusiun: «Il nouv cumün fusiunà surpiglia tuot ils drets e dovairs dals quatter cumüns, e da quels dovairs fan part eir ils contrats da lavur». Scha la fusiun grataja starà decider la gruppa da proget che nom e vopna cha’l cumün fusiunà dess survgnir. <br />Als 25 november sun invidadas tuot las votantas e votants dals quatter cumüns ad üna sairada d’infuormaziun generala davart il proget da fusiun.<br />Autor: ANR