<br />Actualmaing vain fabrichà in Grischun il sviamaint da Silvaplauna, il qual sarà a fin dal 2016. «Fingià bainbod esa da decider chenün proget chi’s realisescha sco prossem», declera Roger Stäubli, il schef da la partiziun construcziun vias da l’Uffizi da construcziun bassa chantunal (UCB). In dumonda vegnan quatter progets: «Sviamaints esa previs da fabrichar a La Punt-Chamues-ch, a Bivio, a Susch ed a Sta.Maria in Val Müstair.» Da prümavaira ha incumbenzà l’UCB ün büro d’indschegners independent da congualar ils progets e da scriver ün rapport. «Quist rapport ans serva lura sco basa per decider chenün sviamaint chi fa la plü gronda prescha», disch Stäubli, «quel proget chi’s tscherna as pudaraja lura cumanzar a fabrichar il plü bod dal 2017, cur cha’l sviamaint da Silvaplauna es realisà e dat liber al trafic.» Che dischan il capo da La Punt-Chamues-ch Jakob Stieger e seis collegas Emil Müller da Susch ed Arno Lamprecht dal Cumün da Val Müstair da quista nouva? <br /><br /><strong>Situaziun inacceptabla a La Punt </strong><br />Per sviar il cumün da La Punt-Chamues-ch exista ün proget chi d’eira gnü fat bun fingià dal 1980. «Nus vain ?istess bler trafic sco Silvaplauna o San Murezzan», disch Stieger, «ils respunsabels dal Chantun han tut suot ögl la situaziun e stuvü admetter cha’l privel es grond impustüt pels uffants chi abitan sülla spuonda da l’Alvra e chi ston traversar la cruschada per ir sur la punt a scoula a Chamues-ch.» Cha’l cussagl cumünal vaiva perquai buna spranza cha lur proget gnia realisà sco prossem, dal 2017, cunti-nuescha’l. Quella pazienza vessna sco ch’el disch amo. «Schi vain però tschernü ün oter cumün e scha nos sviamaint vain fabrichà pür da l’on 2030 schi es quai a meis avis inacceptabel.»<br />&#0160;<br /><strong>Dischillusiun in Val Müstair </strong><br />«La suprastanza dal Cumün da Val Müstair ha express invers il Chantun il giavüsch chi integreschan il proget per ün sviamaint dal cumün da Sta.Maria in lur program da vias», disch il capo Arno Lamprecht. D’instà, cur chi’d es grond trafic, es, sco ch’el manzuna, la situaziun in cumün pels peduns propcha privlusa. Ün sviamaint fess perquai a seis avis nair dabsögn. «Da la nouva cha quel dess gnir fabrichà il plü bod dal 2017 e be scha nos sviamaint vain resguardà sco il plü necessari dals quatter cumüns, da quella suna dischillus.» Sco ch’el ?agiundscha nu’s cunfa bler trafic neir cun üna regiun da Biosfera sco la Val Müstair. <br /><br /><strong>Spranza a Susch </strong><br />«Chi gniss fabrichà il prüm il sviamaint da Silvaplauna am d’eira cuntschaint, eu n’ha uossa la spranza cha nos proget gnia priorisà ed integrà i’l program da vias 2013-16», disch Emil Müller, il capo da Susch, «lura as pudessa cumanzar a fabrichar nos sviamaint dal 2017.» Dad üna votaziun consultativa d’eira resultà cha var 80 pertschient dals abitants füssan perinclets culla proposta da l’UCB da sviar Susch a schnestra da la val, sur il cumün oura. «Schi’d es da spettar amo plü lönch, e quella pussibiltà es güst uschè gronda in vista al fat cha quatter cumüns spettan da survgnir ün sviamaint, schi nu fa quai natüralmaing plaschair», suspüra il capo, «uossa esa da spettar a qual resultat cha’ls indschegners vegnan, chenün cumün chi douvra a lur avis sco prüm ün sviamaint.»&#0160;&#0160;&#0160;
<p>Autor: ANR</p>
<p>&#0160;</p>