Ün grand numer da baps e mammas, nons e nonas ed abitants buondragius da Cinuos-chel fin La Punt haun seguieu da s-chüra not e suot flöchuns da naiv chi crudaivan sainza fin, a la preschantaziun dals iffaunts. Musseders cun faclas mussaivan als spectatuors la via d’üna scena a l’otra – a regnaiva ün’atmosfera fich speciela. A vzair ils pesters sül pro intuorn lur fö, als sudos per las vias intuorn ed a Maria e Josef ad ir, sainza success, da chesa a chesa a picher porta ho persvas ed ho fat impreschiun. Eir l’ultima scena davaunt üna vardadaivla stalla da bês-cha ho lascho resentir la temma e la recugnuschentscha pel ricover da Maria e Josef, surtuot perche cha’l public svess d’eira dadour, suot la naiv. Ün pitschen tröp instrumentel cun ses trumbettas e trais clarinettas ho suno tiers mincha scena üna chanzun da Nadêl, ed eir quists intermezzos musicals haun contribuieu lur part per cha l’istorgia da Nadel, bain cuntschainta a grand e pitschen, es gnida quinteda per üna vouta in möd tuot speciel e fich autentic illas giassas da S-chanf.