Sur En, cun sias temperaturas bassas, es ün lö adattà per experimentar cun l’elemaint glatsch. Ultra da la plazza da glatsch per giovar a tschoccas e da la tuor da glatsch per rampignar han Wolfgang Bosshard, impressari da commerzi a Sur En, e Mario Riatsch, silvicultur da Sent, gnü l’idea da realisar üna via da glatsch per ir culs patins. Per cumplettar la sporta han els eir amo fabrichà ün iglu, chi’d es previs per metter ad ir üna disco. «Sur En dvainta uschea per uschedir il Center da glatsch da l’Engiadina», es la visiun da Wolfgang Bosshardt. Eir scha las temperaturas dal december nun han impromiss bain, nu s’han ils iniziants laschats incuraschar ed uossa, culla naiv, es la culissa intuorn il glatsch perfetta. La Via da glatsch Engiadina fuorma insembel cul Parc da suas Engiadina üna Società cun respunsabiltà limitada.

«Trar a nüz quai chi’d es d’intuorn»
L’idea d’üna via da glatsch es gnüda a Mario Riatsch l’on passà, ch’el d’eira passà cul jeep vers Tremblai, davo chi vaiva plovü ferm e d’eira lura gnü fraid. «La via d’eira dal tuottafat inglatschada, tant chi’s vess bod pudü ir culs patins», raquinta’l. El cugnuschaiva la via da glatsch a Surava ed ha pensà chi’s pudess far eir quia alch uschea. Wolfgang Bosshardt agiundscha, chi saja apunto da trar a nüz quai chi’d es d’intuorn. E cha las temperaturas sun bassa a Sur En, quai sa el chi sta qua daspö sia infanzia. La via a Tremblai nun ha bod ingüna pendenza e passa tras ün god rar cun clerais, dimena adattada per far üna via da glatsch. Il prüm es il traget gnü innaivà cun chanuns, davo es el gnü bognà, vetta per vetta. Var 60 jadas han ils lavuraints manà ün unimoc cun ün tanc da 4000 liters aua bognond il traget. Uossa cha’l glatsch ha la grossezza giavüschada, sto el gnir splanà e bognà mincha di. Quella lavur fa Marco Bettini dürant l’avantmezdi. La davomezdi es la via averta per ir culs patins.

Chi voul manar la disco da glatsch?
Sur ün ballun gigantic han ils iniziants laschà innaiver üna mantunada da naiv. Uschea sun gnüdas fuormadas localitats cun vouts, davo cha’l ballun es gnü allontanà. Il contrast dal glatsch cun glüm e musica po derasar ün’atmosfera exitanta per üna disco, es la visiun dals iniziants. «Quai füss üna sporta per la giuventüna», manaja Wolfgang Bosshardt, «nus tscherchain inchün chi less manar quista disco da glatsch e gnanca nu pretendain fit.» Pel mumaint ston Bosshardt e Riatsch amo verer co cha tuot as sviluppa. «Ün apero d’avertüra dal Center da glatsch varà lö bainbod ed in mincha cas sarà la festa da Silvester aint illa bar da glatsch», manajan Mario Riatsch e Wolfgang Bosshardt e sun plain aspettativas.
La via da glatsch Engiadina es averta da la dumengia fin la gövgia da las 13.00 fin las18.00; il venderdi e la sonda, da las 13.00 fin a las 22.00. Patins pon gnir tuts a fit. Eir gruppas sun bainvgnüdas, dessan però s’annunzchar ouravant. Infuormaziuns implü sün www.eisweg-engadin.ch.