La surdatta dal premi innovativ, chi ha gnü lö lündeschdi passà a Sent, ha gnü lö in ün rom festiv cun accumpagnamaint musical da scolars da la Scoula da musica Engiadina Bassa/Val Müstair. Matthias Bulfoni ha ingrazchà per quist’onur e declerà cha da la visiun fin pro l’avertüra da la Clinica Holistica Engiadina haja dürà unicamaing duos ons. «Nus vulaivan esser la prüma clinica da burnout in Svizra e perquai d’eiran nus eir suot squitsch da temp», ha quintà Bulfoni. Cha quista clinica vain fabrichada a Susch nu d’eira adüna cler. «Nus vaivan plüs lös in evaluaziun», ha dit l’iniziant da la clinica, «però cul grond ingaschamaint da Claudio Andry, quella jada promotur d’economia, e’l capo da cumün da Susch, Emil Müller, ans vaina a la fin decis per Susch.» Uossa es la prüma clinica da burnout in Svizra averta daspö passa ün on.
La Clinica Holistica Engiadina occupa a 41 impiegats cun domicil da Puntraschigna fin a Strada. Da quels lavuran trais illa pratcha ambulanta a Turich ed a München. Ils raduond 650 paziaints l’on vegnan da la Svizra, Germania, Austria ma eir da l’Ingalterra, Nouvazelandia e da l’America. «Susch es cun quai dvantà internaziunal», uschè Bulfoni. Tenor el nu profita unicamaing la clinica, dimpersè eir ils affars e’ls partenaris turistics a Susch e contuorns, da quista spüerta unica. «Daspö ils 1. october vaina ün’occupaziun plaina ed i exista dafatta üna glista d’aspet da passa 20 persunas», es Bulfoni cuntaint. Ils preschains a la surdatta dal premi han pudü constatar cha la Clinica Holistica Engiadina a Susch es ün bun exaimpel, co cha nouvas spüertas innovativas in Engiadina pon avair success sün tuot il muond.
Autor: Nicolo Bass