Per ramasser raps haun ils iffaunts vendieu in vschinauncha da tuottas sorts dutscharias ed otras piculezzas. Lotiers nun haun els be fat bunas experienzas, na tuots haun gieu plaschair dals iffaunts chi ramassan raps ed haun blastemmo cha actuelmaing gnia dapertuot ramasso per da tuot il pussibel. Ma els haun eir fat fich bunas experienzas. «Quella glieud ch’eau d’he inscuntro d’eira fich simpatica», ho dit ün mattet chi vo in 3. classa. Cha tuots hegian, zieva ch’el hegia declaro ch’el ramassa per glieud povra, cumpro qualchosa. «Nus vains pudieu fer bunas discussiuns culla glieud sün via e scha nun es neir adüna reuschieu da vender qualchosa, vainsa almain pudieu sensibiliser a la glieud in connex culla poverted chi regna sül muond», ho managio üna matta.