La gruppa da teater Ratatuglia ha daspö ons adüna giovà tocs da rier e pisseraiva cun quai per divertimaint pro giuven e vegl. Per la prüma vouta han quist on ils actuors rapreschantà ün’istorgia criminala. Quai es stat üna sfida tant pels actuors sco eir per la redschissura Anna Caprez. Als spectatuors haja plaschü: Illa sala da gimnastica da S-chanf regnaiva ün’atmosfera plain tensiun. Dafatta ils uffants tschantaivan sün lur sopchas sainza far mucs.
Il palc da la sala polivalenta a S-chanf d‘eira gnü transfuormà in ün bastimaint. Fingià las culissas chi sun gnüdas fattas svess han tradi cun quant’amur e plaschair cha la gruppa as metta adüna darcheu vi da la lavur. Il delict da la cumedgia criminalistica es capità sülla cruschera Phönix. Ün mordraretsch sün üna cruschera – ün fat cha’ls pertocs nu rivan gnanca da s’imaginar. E pür, id es propcha capità. Sülla barcha regna la püra agitaziun. Il chapitani Hacker, il persunal da la barcha e’ls passagers cumainzan a suspettar a minchün. La cuschinunza Margareta Gisep s’ha sentida obliada da güdar a chattar l’aschaschin. A tuots esa cuntschaint cha seis hobi es leger crimis. Fin cha l’aschaschin nun es stat erui ed arrestà, d’eira la tensiun pro’l public uschè gronda chi nu’s sentiva gnanca a trar il flà.
La prestaziun da las teatristas e’ls teatrists, da la redschia e da tuot ils agüdonts davo las culissas es gratiada. Ultra da quai s’ha la gruppa da teater preschantada cun duos nouvs actuors. Quai ha dat üna misculanza da puter e vallader sül palc chi ha diverti a tuot il public. «Eu sun statta a mincha teater da la gruppa Ratatuglia e n’ha ris larmas, ma hoz n’haja süjà da spür’agitaziun e tensiun», ha resümà üna da las spectaturas l’evenimaint da la saira.
Autor: ANR