Per furtüna nun eira memma fraid e nu boffaiva üngün vent sül champ da naiv preparo specificamaing pel exercizi annuel da salvamaint da lavinas. Ludwig Denoth, organisatur e capo dal corp da salvamaint da la secziun Zuoz dal CAS, declera in möd quiet e pondero als preschaints ils böts dal di. Preschaints sun ils commembers cumünels dal comitè da servezzan da salvamaint da lavinas scu eir divers interessos scu magisters e magistras da skis, chesarinas e glieud chi fo gugent gitas cullas pels. Tuots haun profito da la spüerta gratuita da pudair fer l’experienza realistica d’ün salvamaint da lavinas.

Cun agüd da l’lectronica
Il champ eira spartieu sü in trais secziuns e mincha partecipant ho gieu l’occasiun da pruver svess tuottas trais metodas da salvamaint: tschercher üna persuna culla sonda, cun apparats electronics o cul sistem da ricover «recco». Scha la persuna dischgrazcheda ho cun se ün appart da tschercher, e scha quel es miss sülla funcziun «emetter», lura emetta quel signels. Quels paun gnir recepieus, eir tres la vetta da naiv, dals apparats equivalents culs quêls ils salveders sun munits. Quist sistem inse simpel e geniel es surtuot important pel salvamaint da camarads, que voul dir il salvamaint d’ün cumpagn in lavina tres la persuna accumpagnanta. Quist salvamaint es il pü important, causa chi po gnir spargno uschè fich bger temp, e que es ün factur important per la schanza da surviver in üna lavina.
Simila es la metoda «recco» chi reflectescha cun agüd d’ün apparat da maun ils signels emiss da pitschens chips chi sun hozindi integros in diversas giaccas da skis, s-charpas e vstieus. Apaina cha la signalisaziun (tenor apparat es que ün tun ubain cifras digitelas) indichescha la vicinanza d’üna persuna, vain definieu il punct inua cha stu gnir tschercho. Uossa cumainza il tschercher culla sonda ed in seguit il spaler e deliberer la persuna our da la naiv.

Da sonder dumanda disciplina
Il sonder voul eir esser imprains, perche cha be a furer sainza sistem sün ün chejel da lavina nu porta success. I’l sonder sistematic dumanda disciplina ed üna bun’organisaziun. Tenor il numer da persunas disponiblas vain furmeda üna lingia e furo cun sistem. «Pass, foura, pass, foura»… clama il cumandant e controlla scha tuots fouran inandret: il prüm sper la s-charpa dretta, lura sper la s-charpa schnestra, lura ün pass inavaunt, foura a dretta, foura a schnestra. Uschè resulta üna rait quadrata da fourinas surour la surfatscha elavureda e schi füss üna persuna suotaint, schi gniss ella chatteda cun granda probabilted.

Elicopter e chaun
Vers la fin dal cuors ho eir demonstro ün team da salvamaint da la Heli Bernina scu ch’els rivan da controller in cuort temp üna surfatscha d’üna lavina cun lur sistem da tschercher chi’d es tacho vi d’üna corda suot l’elicopter. Quist sistem tuot speciel reagescha sün tuot ils sistems electronics da salvamaint. Dalum cha’l sistem do ün signel positiv, vain marco il punct correspundent e la tschercha sül lö cumainza immediatamaing.
Scu ultima demonstraziun ho musso ün chaun da lavinas quaunt fin ed indispensabel cha sieu nes es – surtuot cur cha las pussibiliteds tecnicas sun exaustas. Infra pochs minuts ho el chatto la persuna zuppeda in ün cuvel da naiv, ed ho demonstro cha sieu instinct es pü fido e pü effiziaint cu tuot ils mezs electronics, eir ils pü perfets.
Il di d’exercizi da salvamaint da lavinas es sto ün sucess ed ho demonstro in möd impreschiunant las differentas tecnicas per tschercher persunas sepulidas illa naiv. Ma surtuot ho il di eir demonstro cha’l meglder es da niauncha river in üna lavina, percha cha la probabilted da surviver as diminuescha zieva be 15 minuts rapidamaing, adonta da tuot l’equipamaint professiunel e dals numerus mezs da salvamaint chi staun a dispusiziun.
Autor: Erna Romeril