«Ils texts ch’eu n’ha prelet hoz al public qua a Schlarigna sun be cuorts e nu sun perquai mai gnüts publichats», ha declerà Jacques Guidon in marcurdi saira i’l Chesin Manella. El es nat dal 1931 a Zernez sco figl da paur. Hoz es el cuntschaint sco pittur, caricaturist, redschissur, redacter, editur dal Chardun e sco scriptur. Ch’el nu prevezza neir na da tils publichar, ha’l cuntinuà. Eir la scriptura Leontina Lergier-Caviezel ha prelet texts ch’ella nun ha mai publichà. Ella, chi’d es nada dal 1956 a Vrin e chi ha vivü a Genevra, New York, Wengen, Sedrun ed a Puntraschigna viva uossa a Rüfenacht. Dal 2011 es gnü publichà seis cudesch «Nus duas». La scriptura ha in quell’occasiun scrit ün roman ingio chi va per na mütschir da la realtà e da la dolur, «i vain, per uschè dir, miss il daint aint illa plaja», ha dit Lergier-Caviezel. In seguit a sias explicaziuns ha ella prelet differents texts our da si’ouvra.

Las bundant 30 audituras ed audituors da l’occurrenza da marcurdi d’eiran eir fascinats da las expressiuns e dals pleds specials cha tant Jacques Guidon sco eir Leonita Lergier-Caviezel han preschantà e declerà. Uschè ha Jacques Guidon as dedichà tanter oter al pled «clischè». «Nus naschin sco original e murin sco copcha», ha’l manià e declerà co ch’el svess inclegia il pled. Leontina Lergier-Caviezel invezza ha surprais cun pleds chi nu vegnan hozindi bod na plü dovrats. Sco exaimpel ha ella manzunà il pled «lavazzas». Las lavazzas sun üna spezcha da föglias chi creschan sülla prada e süls pas-chs. Il pled po però eir significhar uraglias. «Tscherts pleds dal minchadi dals temps passats stuvessan gnir dovrats plü suvent eir illa vita moderna», füss ün giavüsch da la scriptura.
Il respunsabel e manader dal Chesin Manella, Pol Clo Nicolay, ha manià, chi capita d’inrar cha bundant 30 persunas chattan la via pro las occurrenzas chi vegnan organisadas i’l Chesin Manella. Cha quai til fetscha evidaintamaing plaschair, ha’l dit cun tschera riantada. Ils inscunters organisats suot la bachetta da l’Uniun dals Grischs a Schlarigna han tenor el plüs böts: Per l’üna preschantar ad artists e lur ouvras, per l’otra da muossar al public la vasta paletta da cudeschs ed otras ediziuns rumantschas chi sun expostas illa chasa.
Autor: ANR