«L’on passà chi’d es stat ün on difficil es i a fin da maniera allegraivla», s’allegra Berthold Ketterer, il president dal cussagl administrativ da la Bieraria Tschlin SA. Schabain cha l’installaziun dal nouv indriz per lavar ed imbutigliar la biera engiadinaisa ha gnü grond retard ha la bieraria pudü furnir in december a seis cliaints s-chars 90 hectoliters biera. «Quai es ün resultat mensil grondius», commentescha Ketterer.

Furni l’indriz cun ün mez on retard
Per l’on 2011 vaiva previs la Bieraria Tschlin SA dad installar e tour in funcziun il nouv indriz per lavar ed imbutigliar la biera. Quist proget ambizius chi’s vaiva pudü cumanzar a realisar sco previs s’ha però lura retardà vieplü: Il furnitur ha manà quist indriz a Tschlin cun passa ün mez on retard. «Dürant quist temp transitoric vaina adüna darcheu stuvü reparar l’indriz vegl, quai chi ha gnü per consequenza cha no nu vain pudü furnir tanta biera sco giavüschà.» Quai nun ha, sco cha Berthold Ketterer disch, be diminui las entradas, dimpersè eir strapatschà las nervas dal bierer Florian Geyer, dal persunal chi imbutigliescha la biera e dal cussagl administrativ. Propcha fini las lavuors d’installaziun da l’indriz ha il furnitur pür als 12 schner da quist on. «Per la paja vaina pudü diminuir il predsch per l’indriz per 10 000 euros», infuormescha’l, «invezza da 150 000 euros vaina pajà be 140 000 euros, da maniera cha las spaisas sun plü bassas co previs i’l preventiv.» Il nouv indriz pussibiltescha da lavar in ün’ura uschè bleras butiglias sco avant in ün di. Ün ulteriur avantag dal nouv indriz es chi’s po uossa conservar la biera per bainquant plü lönch. «Grazcha a l’indriz nouvinstallà pudaina finalmaing darcheu dar la garanzia cha no furnischan la biera subit cur ch’ella vain postada.»

Fingià segnà ün terz da las aczias
Dal mais mai 2011 fin al mai 2013 vain dozà il chapital d’aczias da 975 000 francs sün 1,3 milliuns francs. «Fin uossa es gnü segnà fingià ün terz da quistas ulteriuras aczias», disch Berthold Ketterer, «quist fat allegraivel es ün segn da fiduzcha in nossa bieraria.» L’import es gnü transferi sün ün conto bloccà. Id es tenor el previs da transfuormar l’import in etappas in chapital d’aczias. «No sperain cha las acziunaras ed acziunaris sco eir ulteriurs amis da la Bieraria Tschlin SA decidan da cumprar nouvas aczias», disch il president dal cussagl administrativ, «eir scha no vain pudü constatar i’ls ultims ons adüna darcheu ün augmaint da la dumonda per nossa biera dovraina amo daplüs acziunaris chi sun inchantats da la bieraria a Tschlin.»
Autor: ANR