L’atmosfera dürant e davo ils tragets da cuorsa es statta fich buna, malgrà las fradaglias. Blers dals autos vegls chi s’han partecipats a la cuorsa, nun han ingün s-chodamaint. Las fanestras dals autos s’inglatschaivan adüna darcheu dadaintvart. E divers dals autos d’eiran dafatta cabrios. Fat es però cha’ls autos vegls chi s’han partecipats a la «Coppe delle Alpi» nun han gnü ingüns problems tecnics causa las fradaglias.
La «Coppe delle Alpi 2012» ha fat fermativa eir in Val Müstair. Ils partecipants da la cuorsa han pernottà da venderdi sün sonda in Val Müstair. «Nossa val d’eira a blers partecipants da la cuorsa incuntschainta», ha dit Gabriella Binkert Becchetti, directura da la Biosfera Val Müstair e svess partecipanta da la «Coppa delle Alpi». Als partecipants ha plaschü la Val Müstair, e perquai sun eir fingià gnüdas generadas reservaziuns per gruppas o persunas privatas chi vöglian gnir a cugnuoscher plü bain la regiun e sias spüertas. Las listessas reacziuns han gnü ils partecipants cur chi sun rivats a Zernez ed i’l cumün vegl da Scuol. «Nus tuornain darcheu!», han dit blers dals partecipants. Ün ulteriur böt da quist evenimaint es eir ragiunt: «Nus gnin eir quist on chi vain», han declerà ils respunsabels da l’organisaziun da la cuorsa.
Autor: ANR