Avant bundant ün on ha la scoula da muntogna Avrona clomà per agüd. Il Chantun vaiva nempe comunichà da nu sustgnair finanzialmaing la sanaziun urgiainta dals stabiliamaints da la scoula da pedagogia curativa chi vain manada tenor il model da Rudolf Steiner. Perquai vaiva il cussagl da fundaziun decis da serrar la scoula e da tscherchar sustegn pro la politica regiunala. Guido Parolini, sco president da la Pro Engiadina Bassa (PEB), vaiva sgürà sustegn e surtut il presidi dal cussagl da fundaziun da la scoula da muntogna Avrona. Eir Emil Müller, capo cumünal da Susch e commember da la suprastanza da la PEB, d’eira sün quai gnü elet il cussagl da fundaziun. Uossa han tuots duos demischiunà lur caricas per subit. Il motiv per quist eclat es l’elecziun dal nouv manader da la chasa. «Nus vain scrit oura la plazza tenor las pretaisas dal Chantun», declera Guido Parolini sün dumonda. Il Chantun pretenda nempe qualificaziuns cun diploms da pedagogia curativa, pedagogia sociala e cugnuschentschas economicas. Implü stuvess la persuna avair cugnuschentschas e qualificaziuns sco manader da chasa ed esser avert per la filosofia antroposofica. «Nus vain survgni differentas annunzchas da persunas bain qualifichadas», declera Parolini. Davo cha’l temp d’annunzcha d’eira scrodà vulaiva el, sco president dal cussagl da fundaziun, evaluar in detagl las annunzchas e manar ils discuors culs candidats pontenzials.

«Uschè nu’s poja collavurar»
Intant es Parolini però gnü a savair, cha’l cussagl da fundaziun vaiva fingià elet, sainza sezzüdas e sainza cugnuschentschas dal president, duos persunas chi dessan manar insembel la chasa da la scoula Avrona. Quistas duos persunas lavuraivan fingià illa scoula Avrona ed han bainschi cugnuschentschas antroposoficas, però ingünas qualificaziuns da pedagogia curativa. Guido Parolini es consternà da la tscherna ed impustüt da l’agir davo la rain. «Uschè nu’s poja collavurar in ün cussagl da fundaziun ed eu nu pos star davo quista tscherna», motivescha el la decisiun per la demischiun.
Sandra Roner da Sent ha surtut intant il presidi dal cussagl da fundaziun ad interim. Ella declera sün dumonda d’esser persvasa, cha la tscherna da las duos persunas internas saja la megldra soluziun per la scoula Avrona. «Quistas duos persunas vegnan arcugnuschüdas dals scolars e dals genituors sco pedagogs ed han muossà quai fingià sur ons ad Avrona.» Implü saja l’intent da fundaziun da la scoula, da perseguitar la filosofia antroposofica tenor il model da Rudolf Steiner e las duos persunas tschernüdas hajan quistas qualificaziuns. A reguard l’imbüttamaint d’avair reagi davo la rain dal president, declera Roner, cha scha la gronda part dal cussagl da fundaziun d’eira per la soluziun interna, nu faiva quai tenor ella dabsögn da spettar amo plü lönch. «Als ulteriurs candidats potenzials mancaivan las cugnuschentschas da la scolaziun antroposofica», motivescha Roner la decisiun. Dal rest stuvess tenor ella lavurar ün cussagl da fundaziun i’l team. Ella nu zoppa il fat chi dà differenzas tanter il president ed Emil Müller e’l rest dal cussagl da fundaziun. «Quia regnaivan differentas filosofias ed aspettativas», disch la presidenta ad interim. Adonta da quai spera ella eir in avegnir sün üna buna collavuraziun culla regiun.

Il Chantun sto evaluar la situaziun
Eir l’Uffizi da scoula e sport ha tut cogniziun da las decisiuns a reguard la scoula Avrona. Tenor Giosch Gartmann, manader dal sectur scoulas specialas ed integraziun, valan per manaders da chasa las pretaisas descrittas. Tenor el ha il cussagl da fundaziun da la scoula da muntogna Avrona valütà plü ferm la filosofia antroposofica sco las pretaisas economicas e scolasticas dal Chantun. «Uossa dependa suot che cundiziuns cha’l Chantun arcugnuoscha ils nouvs manaders d’Avrona», disch il respunsabel dal Chantun. Perche la Regenza sto arcugnuoscher ed admetter mincha magister o manaders da scoula in Grischun. «Intant nu pudaina amo güdichar il cas d’Avrona, perchè nus nu vain amo cugnuschentscha da las actas.» Uossa es tenor el pretais il Chantun d’evaluar la situaziun e da chattar üna soluziun, cun che pretaisas cha’l permiss vain dat. «Üna cundiziun po esser, cha la scoula sto tscherchar ün pedagog curativ qualifichà chi sustegna ils manaders da la chasa», declera il respunsabel chantunal. Natüralmaing vegnan las contribuziuns finanzialas adattadas a las qualificaziuns da la magistraglia e dals manaders da chasa.
Ad Avrona vegnan instruits 12 scolars da nouv magisters e set chüradas in plazzas plainas e parzialas. Tenor Guido Parolini nun han raduond 50 pertschient dal persunal las qualificaziuns pretaisas. «Cul ingaschamaint dal manader da chasa as vessa gnü la pussibiltà da correger quist resultat», es el persvas. Tenor Giosch Gartmann s’haja in tuot la Svizra difficultats da chattar persunal qualifichà. Adonta da quist fat vezza Sandra Roner bunas schanzas per la scoula Avrona d’exister in avegnir.
Autor: Nicolo Bass