La democrazia es bain ün sistem da l’impussibel. Uossa as mettai avant: I vegnan organisadas votumaziuns ed ingün nu va a vuschar! Quai es tuot fingià gnü avant. Il plü actual es l’exaimpel da l’iniziativa dal pövel per damain bürocrazia in Grischun. A Schnaus es ida ün’unica persuna a vuschar ed ha decis per l’iniziativa. Che eroe! E che pussanza cha quista persuna ha gnü. Ella ha decis per ün cumün inter. Per furtüna haja dat i’l rest dal Chantun amo daplüs interessents.
Co d’eira quai i’ls ons 80? Chi s’algorda amo da quella votumaziun spectaculara? Il tema da votumaziun nu m’es plü cuntschaint. Cuntschaint es unicamaing amo, cha a Tschierv nun es ida gnanc’üna persuna a vuschar. Cuntschaintas sun eir amo las votumaziuns, ingio cha la populaziun da Lü ha sustgnü sainza cuntravuschs ils desideris dal parti da quel hom cuntschaint, chi ha in seguit sco grazcha fich sustgnü finanzialmaing la sanaziun dal tet da la baselgia. Nu d’eira propcha ingün cunter o nu sun quels simplamaing na its a vuschar?
La tscherna da l’ultim cusglier guvernativ d’eira eir speciala. Ün unic candidat s’ha miss a disposiziun. Es quai amo democrazia? Oters ons han cumbattü plüssas persunas per mincha singula vusch. E cumbattü es il dret pled. Perchè quel chi sbraja il plü da dad ot ed es bun da motivar il plü ferm, guadogna. Quai es democrazia. Minchatant s’haja svess in man la decisiun e minchatant decidan oters, minchatant eir davart temas chi nu tils pertocca gnanca direct. Ma bella quista, eir quai es democrazia! Adonta cha quella sumaglia minchatant plütost ad üna curatella.
Ed uossa, che es il facit: La democrazia nun es adüna simpla ed inclegiantaivla. Minchatant forsa gnanca güstifichada. Però ella es amo adüna il meglder sistem politic cuntschaint. E per nossas pussibiltats democraticas gnina admirats da tuot las varts. Nus eschan üna part da tuot il sistem democratic. Che flot!
Autor: Nicolo Bass