Il cumün da Zernez e’l manader da gestiun Domenic Scandella pon verer inavo sün tschinch ons gestiun da bogn chi han portà früts. Quai eir davo cha’l bogn da Zernez vain manà sün agen quint e na plü suot la gestiun da la Bogn Engiadina SA.
Il bogn da Zernez po registrar in media 30 000 entradas l’on. Sco cha Scandella declera vain il bogn frequentà per la gronda part dad indigens. Cha dürant la stagiun d’inviern gnia la spüerta predschada impüstüt da giasts chi fetschan passlung. «Els vegnan nanpro da tuot l’Engiadina culs skis da passlung, giodan il bogn e davo tuornan els cul tren o cun l’auto darcheu a chasa», uschè Scandella. Cha la cumbinaziun dal bogn da famiglia cullas loipas da passlung saja fich importanta. Dürant l’inviern vain predschada la sporta impustüt da famiglias chi passaintan lur vacanzas illa regiun. «D’instà as poja giodair l’infrastructura cunfinanta al bogn chi cumpiglia il restorant Center da sport, plazza da giovar, minigolf ed oter plü, in möd cha giasts passaintan ün inter di pro nus», disch Scandella. Il bogn da famiglia svess spordscha trais batschigls: Ün batschigl grond ed ün batschigl plü pitschen cuernà per uffants. Il terz batschigl as rechatta suot tschêl avert.
In sonda, ils 18 favrer, invida il cumün da Zernez ad indigens e giasts a festagiar il giubileum da tschinch ons «bogn da famiglia». Da las 13.30 fin a las 18.00 vain spüert a minchün ün’entrada libra i’l bogn. Implü han tuots la pussibiltà da dar ün cuc davo las culissas in visitond la gestiun dal bogn. Ultra da quai daja eir üna concurrenza cun divers premis. A partir da las 17.00 es organisada üna grillada e tramagl da cumpagnia i’l restorant Center da sport a Zernez.
Autor: ANR