Culla nouva contribuziun nomnada «qualità da la cuntrada» ha la Confederaziun il böt dad onurar las masüras per chürar las cuntrada cultivadas tradiziunalas e nouvas in Svizra. Uschè as lessa mantgnair la multifarietà da las cuntradas svizras. Per concretisar il concept da quista nouva sort da sustegn federal ha schelt l’Uffizi federal d’agricultura d’utuon 2010 quatter regiuns pilot: Il terrain agricul e la pas-chüra da Ramosch e Tschlin, las Franches Montagnes i’l Giura, il Limmattal e la planüra d’Orbe i’l chantun Vad. Fin dal la fin da l’on 2011 vaivan rapreschantants da las singulas regiuns temp d’elavurar ils criteris per definir la qualità d’üna cuntrada e per propuoner masüras co mantgnair la cuntrada cultivada. In Engiadina Bassa es gnüda incumbenzada la Pro Terra Engiadina (PTE) da manar il proget pilot.

Promouver la cultivaziun da chomps
La PTE chi vain presidiada dal paur e capo da Ramosch Victor Peer s’ingascha per mantgnair e cultivar cuntradas da valur culturala e natürala in lur diversità in Engiadina Bassa e las vals limitrofas. L’on passà ha la gruppa operativa dal proget, da la quala fan part ultra da Victor Peer la biologa Angelika Abderhalden, il cusgliader pauril Riet Pedotti e Valentin Luzi da l’Uffizi d’agricultura e geoinfuormaziun chantunal, lavurà intensivamaing: «Cul sustegn da gruppas accumpagnantas da specialists per valütar cuntradas sco eir da paurs indigens e glieud interessada da la populaziun ans vaina miss a la lavur», disch Vitor Peer, «nus vain provà da definir masüras per ragiundscher il böt da mantgnair nossa cuntrada e perfin dad augmantar amo la qualità da quella cun tuot sia biodiversità.» Quai füss tenor el pussibel tanter oter eir cun cultivar a Ramosch ed a Tschlin darcheu daplüs chomps. La gruppa operativa invida als 21 favrer a Tschlin ad üna orientaziun davart quista ed otras masüras per mantgnair ed optimar amo la qualità da la cuntrada cultivada.

Cun referents da Cuoira e da Berna
Il proget «qualità da la cuntrada» sta in connex cul svilup dal sistem da pajamaints directs e fa part da la prosma refuorma agricul-politica (AP2014-17). Davo l’introducziun da Victor Peer preschantarà Markus Richner da l’Uffizi d’agricultura federal perquai l’agenda da la politica agrara 14-17 e darà üna survista da tuots quatter progets pilot in Svizra. «La valur dal proget pilot a Tschlin e Ramosch pel chantun Grischun», sarà il tema da l’orientaziun da Valentin Luzi. Angelika Abderhalden e Riet Pedotti preschantaran il proget pilot in Engiadina Bassa e nomnaran lura insembel cun Victor Peer ils prossems pass da quist proget. Davo l’orientaziun sun tuot ils preschaints invidats da’s partecipar a la discussiun e da dir lur parair.
Autor: ANR