Actualmaing existan unicamaing deponias da material da s-chav a Zernez e Prà Dadora tanter Martina e Vinadi. Tuot il material da las fabricas in Engiadina Bassa vain pel mumaint deposità sün quistas deponias. «Ils lungs viadis cul material da s-chav incharischan ils cuosts da fabrica massivamaing», ha constatà Reto Rauch, manader da gestiun da la Pro Engiadina Bassa (PEB). Tenor el nu faja neir sen da far culs camiuns da material lungs viadis per depositar il material da s-chav. Perquai ha la PEB reagi e tscherchà insembel culs cumüns soluziuns e lös adattats per ulteriuras deponias da material. Ün lö füss per exaimpel stat «Üschplans» sülla via da S-charl sur Gurlaina. Quist lö da deponia ha pisserà per grondas discussiuns eir pro’ls abitants da S-charl. Tenor Reto Rauch ha a la fin eir la discussiun cul Chantun muossà, chi’s voul as concentrar sün deponias cun ün volüm plü grond. «Perquai nun es üna deponia ad Üschplans plü ingün tema i’l plan directiv regiunal», uschè Rauch. Intuorn Scuol dessan gnir realisadas las deponias Tars II e Tars III ad Ardez, Plansechs a Scuol e Parnasura a Sent. La prüma deponia chi dess gnir in vigur es Tars II suot Ardez. Tenor Rauch ha quista deponia lö per material per bundant duos ons. Il cumün d’Ardez sto unicamaing amo decider il reglamaint per quista deponia. «Cur cha quista deponia es plaina, dessan seguir las deponias tenor priorità Plansechs a Scuol, Parnasura a Sent e Tars III ad Ardez.» Per Reto Rauch s’haja cun quistas deponias plazza per material da s-chav pels prossems 15 ons.

Deponias in Engiadina Bassa
Il Chantun vess favorisà ün’unica deponia gronda per tuot l’Engiadina Bassa. «Nus vain stuvü persvader il Chantun dals motivs per plüssas deponias», disch il manader da gestiun da la Pro Engiadina Bassa. La plü gronda depositar da material da s-chav resta a Prà Dadora. «Quia es eir fingià previs da deponar il material da s-chav da la fabrica da l’Ouvra electrica cumünaivla GKI», uschè Rauch. In Samignun dess gnir realisada la deponia Val Musauna. Cur cha quella deponia es plaina, sun fingià previssas ulteriuras deponias a «Plaz Maisas» e «Tschischanader». Eir a Zernez es la deponia actuala bod plaina. Üna nouva deponia es previssa pro l’Ova Spin. Quai adonta cha quist territori es üna part da l’inventar per cuntradas cun importanza naziunala. «Quista deponia vess capacità per drizzar aint üna gestiun permanenta», es persvas Rauch. Per plü tard esa lura previs da drizzar aint la deponia Crastatscha Suot a Zernez. «Pel mumaint vain quia amo fabrichà giò material», disch Rauch. La deponia da Crastatscha dess però gnir ütilisada unicamaing per singuls progets da fabrica.

Publicaziun fin als 3 marz
Eir a «Parnasura» a Sent, sper l’En a Sur En, vain actualmaing amo fabrichà giò respectivamaing retrat material. Per Rauch vess quist lö ün grond potenzial sco deponia gronda da material. Però la ledscha per la protecziun da las auas nu permetta üna deponia massa gronda.
Il plan directiv regiunal e’l plan directic chantunal cullas deponias previsas sun publichats fin als 3 marz. Tenor Reto Rauch ha dürant quist temp minchün la pussibiltà da recuorrer cunter las deponias previsas respectivamaing cunter il plan directiv. Schi nun aintran ingüns recuors, decida la radunanza regiunala lura in avrigl definitivamaing sur da la planisaziun regiunala e cun quai sur da las deponias da material da s-chav.
Autor: Nicolo Bass