Mengia Ambühl-Cordett, Latsch 1920-2012

Mi, 28. Mär. 2012

Als 2 marz ho Mengia Amühl pudieu celebrer sieu 92evel anniversari e be duos dis pü tard es gnieu l’aungel da la mort ed ho serro sieus ögls per adüna.

Mengia es gnida purteda giò’l sunteri accumpagneda d’üna granda raspeda funebra. Latsch eira trist, il tschêl grisch, il clam dals sains somber, la granda part da las chesas abandunedas. Uossa posa Mengia sper quels chi haun eir passanto la granda part da lur vita a Latsch. In 70 ans ch’ella eira steda cò da chesa, vaiva ella accumpagno a confamiliers, chantunais, amihs e cuntschaints da tuottas eteds a lur ultim repos. Adonta cha Mengia vaiva banduno già da giuvnetta la vschinauncha nativa da Zuoz, vaiv’la mantgnieu la colliaziun cull’Engiadina e las algordaunzas eiran preschaintas fin l’ultim di. Dals ans traunter las duos guerras mundielas nu’s vaiva la cucagna, ma modestia e simplicited sun stedas las virtüds preziusas per tuot la vita. Mengia eira creschida sü cun trais fradgliuns. A chesa vaiv’la bainschi imprains a lavurer in chesa e sül fuonz, ma a la scoula da duonnas a Cuira as faiva l’economia forsa ün pô oter cu a Zuoz tals Cordetts. Ün’ agüdaunta sculeda e bain educheda vaiva quella vouta bod chatto üna plazza. Mengia rivet a Latsch, üna vschinauncha purila collieda cun tradiziun, famiglias cun iffaunts, üna populaziun lavuriusa e simpla. Mengia ho lavuro in püssas economias fin ch’ella ho svess fundo famiglia cun Josty Ambühl e s’ho stabilida süsom vschinauncha in chesa cul sör e cullas quinedas. Dal 1945 det que divers poppins a Latsch, tals Ambühls naschit l’Ursula. La famiglia creschit inavaunt cul Andrea e l’Otto. Sper sieus dovairs da mamma ho Mengia adüna gieu temp per güder inua cha’l bsögn clamaiva. Bod eira que i’l restorant da la Posta veglia, bod illa chesa d’iffaunts Bethanien e cur cha gniva fat bacharia as clamaiva a Mengia per gnir a güder, ella cugnuschaiva las liangias da mincha chesa. Famiglia, lavur sül fuonz, a nu restaiva bger temp per as recreer. Duos sairas l’eivna eira chaunt, il cor da Latsch dispuniva quella vouta da fich bunas vuschs. L’alt da Mengia eira sgür e nettischem. Vacanzas? Que eira ün pled pels esters, intaunt cha per las puras da Latsch eira l’ir ad acla il pü bel temp da l’an. D’utuon vers saira s’instradaivan ellas per Tuors, chi as fermaiva a Tuors Davant, chi a Punt d’Alps e Mengia vaiva il pü lung viedi fin a Chaclauet. La saira gniva pavlo, forsa as faiva auncha s-chagna ün mumaint, alura eira que l’Ova da Tuors chi ninaiva in sön.
Bger s’ho müdo zieva avair schmiss cull’agricultura. In chesa Ambühl det que duos abitaziuns da vacanzas ed ans ed ans gnittan ils listess esters a passanter cò lur vacanzas. In chesa svess gnit que però adüna pü quiet. Ursula ed Andrea , vaivan marido, dal 1993 murit Josty. Per furtüna as stabilit l’Otto definitivamaing in chesa a Latsch. La mamma cuschinaiva, el güdaiva in chesa ed in üert, la cumbinaziun ideela per tuots duos. Mengia vaiva bod 91 ans cur ch’üna puoncha la sfurzet dad ir a l’ospidel. Que füt eir pel cour ün grand strapatsch, uschè ch’ün retuorn a Latsch nu gnit pü in dumanda.
La trapasseda pudet auncha passanter ün an paschaivel illa chesa d’attempos a Tusaun, accumpagneda da chüra premurusa e da bunas amicizchas, ün an in sia lungia vita ch’ella pudet as lascher servir e perfin meladüser! Ella ho eir gieu temp da repasser sieu passo, bels e trists mumaints, üna vita accumplida. Ma sieus impissamaints eiran auncha pü suvenz tar sieus iffaunts, abiedis e bisabiedis, chi haun pissero per taunt plaschair e furtüna.
Uossa es cò la fossa, chi quinta las algordaunzas persunelas a minchün chi’s ferma. R.I.P.
Autorin: Anita Gordon

Kategorie: 

KOMMENDE EVENTS

STELLEN

IMMOBILIEN

DIVERSES