Quista gövgia saira, ils 21 gün, vain decis a Zernez, Susch, Lavin e Guarda a reguard la fusiun dals cumüns. In mincha singul cumün ha lö üna radunanza cumünala culla tractanda da fusiun.

Tenor la missiva dal proget da fusiun, dess il nouv cumün avair nom Zernez. Cun quist nom vöglian preschantar ils respunsabels dal proget da fusiun, in avegnir la nouv’organisaziun politica e l’organisaziun administrativa e profitar, cha Zernez es fingià cuntschaint sco porta dal Parc Naziunal Svizzer.

Sco vopna dal nouv cumün fusiunà esa previs da surtour la vopna dal cumün da Zernez. Tenor la missiva vegnan ils ulteriurs noms dals cumüns mantgnüts e las tablas dal lö restan sco fin uossa.

La votaziun a l’urna es previsa sco il plü ot organ dal cumün nouv. In votumaziun vegnan elets ils commembers dal cussagl cumünal, il president cumünal, la cumischiun sindicatoria e’l cussagl da scoula. A l’urna vegnan decis eir müdamaints da la constituziun cumünala e da las ledschas cumünalas. Cun radunanzas cumünals vegnan approvats tanter oter il preventiv e’l rendaquint, sco eir il pè d’impostas.

Administraziun cumünala a Zernez

Al cussagl cumünal fan in avegnir part il president cumünal e ses commembers. Almain per la prüma perioda d’uffizi dessan las fracziuns da Brail, Guarda, Lavin e Susch avair il dret d’ün sez e la fracziun da Zernez da trais sezs. L’administraziun cumünala vain centralisada a Zernez. Per simplifichar l’access a l’administraziun cumünala dess gnir realisà ün fnestrigl virtual. Cun fusiunar ils cumüns da Guarda, Lavin, Susch e Zernez dess gnir scholt il consorzi da scoula A fin Z, resguardond il temp da desditta da tschinch ons. Ils affars da scoula dessan darcheu suottastar al cumün politic. Ils sclerimaints da la gruppa da fusiun han muossà, chi füss eir in avegnir pussibel da manar üna scoula da Guarda fin Zernez cul lö da scoula Zernez ed ün in ün’otra fracziun. Il cumün nouv dess eir restar partecipà per intant a tuottas duos destinaziuns turisticas, voul dir Zernez a la destinaziun Engadin St. Moritz, e Guarda, Lavin e Susch a la destinaziun Engiadina Scuol Samignun.

Cun avantags finanzials per tuots

Per la realisaziun da la fusiun survgnissan ils cumüns ün sustegn finanzial dal Chantun da 3,5 milliuns francs. Implü ha la Regenza impromiss da fixar il nouv cumün illa classa da finanzas trais. Quai maness tenor la missiva avantags finanzials a tuot ils cumüns respectivamaing fracziuns ed impustüt a quella da Zernez chi’d es hoz illa seguonda classa da finanzas. Il pè d’impostas dess esser pro 84 pertschient. La capacità d’investiziuns s’augmainta a raduond trais milliuns francs l’on.

Pel president da la gruppa preparatorica da fusiun maness la fusiun daplü avantags co dischavantags per tuot las fracziuns. Perquai propuonan tuot las suprastanzas cumünalas da Guarda/Giarsun, Lavin, Susch e Zernez/Brail a la populaziun d’approvar il contrat da fusiun.

Autor: Nicolo Bass