«Uossa va a fin nos on da scoula e cun el nossas lavuors preparatoricas per pudair ir a Chester in Ingalterra», disch Janet Lehner, magister da classa da l’ottavla classa dal Consorzi da scoula AfinZ. A fin va quel cun üna preschantaziun da teater chi gnarà fatta bel ed aposta cun l’intent da «guadagnar amo ün pêr raps» per pudair ir in Ingalterra.

 

Avant quatter ons ha il magister d’inglais Jon Candrian da Zernez organisà per la prüma vouta ün’eivna d’inglais intensiv a Chester. Ils scolars passaintan il temp a Chester pro famiglias indigenas. «Els ston discuorrer inglais per conversar cun lur famiglia da giast e quai es fingià da grond avantag per imprender meglder la lingua», disch Candrian. Dürant ils avantmezdis da l’eivna van ils scolars a scoula, quai insembel cun scolars da tuot il muond. Dürant il davomezdi vegnan organisadas differentas occurrenzas ed excursiuns per gnir a cugnuoscher eir la cultura inglaisa. Las sairas vegnan passantadas da cumpagnia. «Quist viadi cuosta bler e perquai vaina adüna darcheu da far alch per implir nossa chascha da scoula», accentuescha Janet Lehner. E quai han ils scolars adüna fat cun grond ingaschamaint e blera buna vöglia. «I va per alch bel», declera üna da las scolaras chi’s parteciparà l’ultima eivna da lügl al grond viadi. E cha perquai fetscha eir plaschair da s’ingaschar.

 

In december da l’on passà ha la scoula da Zernez tut part al marchà d’Advent a Zernez ed ha in quell’occasiun vendü prodots cuschinats svess ed eir lanternas zambriadas a scoula.Ultra da quai han ils scolars parti oura las marcas da la Pro Juventute. «Da rumir prada e pas-chs es stat üna gronda lavur chi ha pretais forza corporala – ma eir quistas lavuors han ils scolars e las scolaras fat cun grond ingaschamaint», s’algorda Lehner. Impustüt il fat cha quistas lavuors sun gnüdas prestadas dürant il temp liber demuossa tenor el l’interess da la classa da’s «guadagnar il sogiuorn a Chester». Implü ha la classa organisà dürant l’on la concurrenza da «leger al meter» e tscherchà divers sponsuors per lur lavuors. «Uossa vaina preparà ün teater chi vain preschantà in trais cumüns da nos consorzi da scoula», tradischa il magister da classa. I’s tratta d’üna cumedgia d’ün act, preschantada vain quella dad ot scolaras e scolars. Ils oters ot scolars sun ingaschats davo las culissas.

 

 Il toc «La cumoda veglia» vain preschantà als 22 gün in chasa da scoula a Lavin, als 26 gün in chasa da scoula dad Ardez ed als 27 gün i’l Hotel da la Staziun a Zernez.

 

Autor ANR