In settember han las votantas e’ls votants grischuns da decider a l’urna a reguard la refuorma da las regiuns. Il Grond Cussagl ha deliberà quista refuorma in occasiun da la sessiun in Samignun cun gronda majorità a man da la votumaziun. Eir dürant la sessiun in Samignun ha la grond cusgliera Leta Steck-Rauch (PLD, Ramosch) fat la dumonda da müdar il nom da la regiun dal district En sün Engiadina Bassa–Val Müstair. Quist müdamaint ha il parlmaint grischun acceptà unanimamaing. Cun üna charta da lectur illa Posta Ladina da sonda, ils 21 lügl, critichescha Georg Buchli da Sent, sco president dal Tribunal districtual En quista decisiun e metta in dumonda la cumpetenza dals ses grond cusgliers d’Engiadina Bassa e Val Müstair. «Quist müdamaint nun es simplamaing na pratichabel», declera Buchli sün dumonda. In sia funcziun sco president districtual saja el bler in contact cun persunas a l’ester e stopcha suvent custabgiar il nom dal district. «Co as vöglia in avegnir custabgiar ün nom chi cuntegna 24 custabs, quatter da quels scrits grond, cun trais intervals ed ün strich d’uniun?»

«Ün nom na pratichabel»

Georg Buchli es gnü miss davant fats accumplits. Ingün nun ha ouravant dumondà seis parair. «Cur ch’eu sun tuornà da las vacanzas suna gnü a savair da quista decisiun», quinta’l. Buchli critichesa impustüt eir il fat, cha la dumonda da müdamaint nu saja gnüda depositada sco üsit in occasiun da la procedura da consultaziun pro la cumischiun predeliberanta, dimpersai pür in occasiun da la sessiun. Per Buchli nu es il müdamaint dal nom gnü stübgià a fuond, «e chi chi nu stübgia a fuond nu tocca i’l parlamaint a Cuoira.»

Tenor la grond cusgliera Leta Steck-Rauch s’haja stübgià bain ed intensiv a reguard il müdamaint dal nom sün Engiadina Bassa-Val Müstair. «Las nouvas regiuns sun plü fermas ed han bler daplü incumbenzas co be la lezcha dal tribunal districtual. La giurisprudenza districtuala es be üna lezcha suot il tet da quistas nouvas regiuns», argumentescha Steck-Rauch. Perquai s’haja eir vuglü chattar ün nom chi’s cunfà cul perimeter da la regiun pertocca. E cul nom En nun ha la Val Müstair da chefar insomma nüglia. Tantplü cha la missiva prevezzaiva, tenor la grond cusgliera, unicamaing la fuormulaziun tudais-cha «Inn» e na la versiun rumantscha.

Üna soluziun bain ponderada

L’iniziativa dal müdamaint dal nom es gnüda da la Pro Engiadina Bassa (PEB) in collavuraziun cul cumün da Val Müstair. «Nus vain bainschi laschà passar il temp da consultaziun. Però quai nu voul dir cha’l müdamaint es main ponderà», declera Guido Parolini, president da la Pro Engiadina Bassa. Uschè ha la PEB orientà cun üna charta als presidents cumünalas ed als grond cusgliers sur da l’intenziun e tut aint in quist möd l’acconsentimaint dals politikers da la regiun. Il president districtual nun es ouravant gnü contactà. «Perquai sarà Georg Buchli uossa offais», disch Parolini. El es amo adüna persvas d’avair chattà il meglder nom chi rapreschainta tuot la regiun.

Georg Buchli declera da nun esser offais. Cha ad el vaja per pratichar il nom illa lavur da minchadi. «Eu füss stat cuntaint eir cul nom «Fuorn» o «Zernez», ma na cun Engiadina Bassa–Val Müstair». Perquai ha el deposità üna charta correspundenta eir pro la Regenza culla pretaisa da correger il sbagl.

Il president dal Cumün Val Müstair, Arno Lamprecht, nu discuorra in mincha cas na da sbagls. «Nus vain adüna be pers ils ultims ons», quinta’l e manzuna il district Val Müstair chi’d es gnü scholt o l’uffizi da stadi civil e l’uffizi da falimaint chi sun its in Engiadina Bassa. «Perquai varana uossa bain merità d’esser resguardats almain cul nom», as dumonda Lamprecht e muossa pacca incletta per las intimaziuns da Buchli. «Engiadina Bassa-Val Müstair es l’unica soluziun correcta», conferma eir Jon Domenic Parolini, capo da Scuol, grond cusglier e commember da la cumischiun preparatorica, «perquai esa stat necessari da far quist müdamaint.»

Autor: Nicolo Bass