La radunanza regiunala da la Pro Engiadina Bassa (PEB) vaiva l’on passà incumbenzà a la suprastanza e’l manader da gestiun d’elavurar üna glista cun progets importants chi sun dependents d’üna finanziaziun regiunala. In occasiun da la radunanza regiunala da mardi passà a Ftan han il president da la PEB, Guido Parolini, e’l manader da gestiun Reto Rauch, preschantà üna glista cun üna tschinquantina da progets als capos cumünals e grond cusgliers da Zernez fin Samignun. Il giavüsch per üna glista d’eira creschü impustüt eir culla decisiun da vulair sustgnair la cumprita dal Chastè da Tarasp cun ün sustegn regiunal da raduond trais milliuns francs. Per pudair decider definitivamaing vulaivan ils politikers savair che ulteriurs progets chi gnaran in futur a dumondar sustegn. Reto Rauch ha perquai scleri ils giavüschs pro’ls cumüns e preschantà il resultat. Ils respunsabels da la PEB nun ha be infuormà sur dals progets, dimpersè güst eir preschantà ün model da finanziaziun pe’ls progets regiunals.

Üna soluziun innovativa

La proposta per la finanziaziun da progets regiunals as basa sül consüm d’energia i’ls singuls cumüns. In trattativas cun las Ouvras Electricas d’Engiadina vaivan ils cumüns concessiunaris elavurà üna cunvegna a reguard il predsch per la cumprita da l’energia supplementara. Quista cunvegna definischa il predsch d’energia dals cumüns pro’ls cuosts da producziun plus ün rap. Sco cha Guido Parolini ha infuormà in radunanza regiunala es quai 1,4 raps pro ura kilowatt plü favuraivel co’l predsch da cumprita d’energia da fin quà. «Vairamaing stessan ils cumüns dar inavant quist rebas als consüments», ha’l declerà, «però scha’ls cumüns tegnan quist rap per investiziuns cumünals dess quai ün import da raduond 890 000 francs per la finanziaziun da progets regiunals.» Tenor el resta il predsch d’energia pels consüments listess e füss amo adüna bundant 30 pertschient plü favuraivel co la media svizra.

Scumpart tenor consüm d’energia

Ils preschaints han muossà plaschair pe’l model da finanziaziun da progets regiunals. La clav da scumpart dals cuosts gniss in mincha cas calculada tenor il consüm d’energia da mincha cumün. Scha’ls cumüns vöglian contribuir lur part cun munaida our da la vendita d’energia o our d’ün’otra chascha cumünala vain surlaschà als cumüns. Uschè vain dat tenor Parolini eir la pussibiltà dals cumüns da Samignun e da Val Müstair da’s partecipar al fondo regiunal, eir scha quels nu sun commembers da la Corporaziun dals cumüns concessiunaris. Il model cun ün fondo regiunal nun ha provochà gronds votums. Per daplü discussiuns ha pisserà la glista da progets e las pretaisas cha quists progets ston accumplir per gnir finanziadas our dal fondo regiunal. In mincha cas prevezza il model cha las contribuziuns vegnan decisas almain in radunanza regiunala, scha na dafatta in üna votumaziun sur tuot la regiun. D’üna prüma valütaziun füssan raduond 15 progets da quels 50 progets registrats degns da gnir sustgnüts regiunalmaing.

Decisiuns fin in november

La radunanza regiunala ha decis da proseguir l’idea d’ün fondo regiunal ed ha fingià elavurà üna cunvegna per la promoziun dals progets importants per tuot la regiun. Mincha cumün sto uossa decider in radunanza cumünala o cun üna votumaziun a l’urna fin la fin da november a reguard la cunvegna e s-chafir uschè la basa legala. Scha duos terzs dals cumüns decidan da’s partecipar a quista cunvegna, füssan da pajar ils prüms imports cumünals i’l fondo regiunal fingià dal 2013.

Autor: Nicolo Bass