Actualmaing vegnan drivits eir ils chaschuots cun progets chi faivan fin uossa puolvra. I paress sco scha tscherts stabilimaints sdasdessan our dal sön da Rösaspina. Uschè es ultimamaing per exaimpel statta publichada la dumonda da fabrica per transmüdar l’anteriur Hotel Hohenfels a Scuol in abitaziuns. Quist stabilimaint chi’d es degn da gnir mantgnü es stat dürant ils ultims dudesch ons vöd ed ha fat ün’apparen-tscha trista. Il Hotel Hohenfels vaglia sco perdütta dals buns temps turistics da plü bod cun privel da dvantar üna ruina dal temp d’hozindi. Il possessur e patrun da fabrica, Jachen Giston dad Ardez, nu’s voul però laschar leger dal tuot illas cartas. El discuorra da quatter fin tschinch abitaziuns chi dessan gnir realisadas our dal stabilimaint. Tenor ledscha da fabrica ston gnir realisadas almain 30 pertschient prümas abitaziuns. Adonta cha la dumonda da fabrica es inoltrada, sta la realisaziun amo illas nüvlas e plüssas variantas sun in discussiun. Scha l’actività da progetaziun haja a la fin da chefar cull’iniziativa cunter seguondas abitaziuns, nu voul Giston confermar. Tantüna sajan els fingià daspö trais ons landervia a progetar. 

 

Autor: Nicolo Bass