«Davo la votumaziun dals 11 marz davart las seguondas abitaziuns vezzaivan divers affarists in nossa regiun l’avegnir fich s-chür», disch Claudio Andry, il president da la Società da commerzi e mansteranza Engiadina Bassa (SCM) chi quinta 240 commembers. Che voul dir quista decisiun per la regiun, daja amo avuonda lavur ed entradas as dumandaivan blers. Perquai s’ha il fiduziari da Ramosch miss in colliaziun cun var 15 persunas da tuot las branschas. El tils ha invidà ad ün inscunter per discussiunar che chi’s pudess far. «In quist’occasiun es nada l’idea d’organisar davo 14 ons darcheu ün’exposiziun regiunala sco la EBexpo 1998.» Els han scrit als affars illa regiun e giavüschà a tuot quels chi vessan interess da s’annunzchar provisoricamaing.

Passa 80 annunzchas

Claudio Andry s’allegra chi sun entradas fin uossa 82 annunzchas da tuot las branschas pussiblas: I’s tratta ultra da numerus affarists e butiers sco eir d’hoteliers e gastronoms per exaimpel eir da duos bancas chi han lur filialas illa regiun, da la Biera Engiadinaisa, dal Center da sandà regiunal, da l’Institut Otalpin Ftan, d’ün artist independent, d’impraisas da fabrica, d’architects ed indschegners, da la Pro Engiadina Bassa ed eir l’organisaziun turistica regiunala. «A l’ultima EBexpo as vaiva partecipada üna sesantina da firmas ed instituziuns.» Il böt es, sco ch’el manzuna, da preschantar las capacitats chi existan illa regiun, «la glieud dess pudair verer cha per cumprar per exaimpel üna nouva chadafö nu stona ir giò la Bassa.» Ün ulteriur intent es tenor el da muossar a las scolaras e scolars quants differents mansters chi pon imprender fond il giarsunadi illa regiun: «Ils giuvenils chi s’interessan per ün o tschel manster as pon indreschir directamaing pro’ls possessuors dals singuls stands.»

L’EBexpo 2013 esa previs da realisar quist on chi vain dals 26 fin 28 avrigl a Scuol in Gurlaina illa halla da glatsch e per part davant quella. Da quel temp nun esa ingün glatsch illa halla. Il grond avantag da quista halla es, sco cha’l president da la SCM accentuescha, chi’d es avantman tuot l’infrastructura necessaria, cun lö pels stands e cun restorant. Claudio Andry nomna ils prossems pass pel comitè d’organisaziun da l’EBexpo da quist on chi vain: «Per pudair calcular ils cuosts spettaina uossa chi aintran las offertas per exaimpel per tour a fit la halla e per l’infrastructura a l’extern da quella, e las respostas da l’Uffizi per economia e turissem chantunal sco eir dal Forum economic d’Engiadina Bassa, als quals no vain dumandà per ün sustegn.» Subit cha quai es il cas farà il comitè d’’organisaziun il budget ed infuormarà als 82 affarists ed impressaris chi s’han annunzchats ed als ulteriurs chi s’annunzchan amo. Fin in november han els lura temp da s’annunzchar definitivamaing.

Autor: ANR