Avant 20 ons ha il Bogn Engiadina Scuol (BES) festagià l’avertüra e miss cun quai la basa pel svilup ad üna destinaziun turistica da tuot on. Il BES ha dürant quists 20 ons adüna darcheu investi e modernisà la spüerta, però la concurrenza nun es neir statta salda. As d’eira quella jada amo l’unic bogn cun üna simla spüerta da wellness in ün rinch da bundant duos uras viadi, s’han svilupadas differentas spüertas da wellness attractivas in tuot quist contuorn. Invezza da gnir a Scuol a far il bogn, han ils giasts da sur cunfin pudü tscherner tanter ils bogns da Meran (Italia) o Längenfeld (Austria), per manzunar be ün pêr. Sco cha’l nouv directer dal BES, Gerhard Hauser, ha manzunà in sonda a Scuol, ha il BES badà la concurrenza cun üna stagnaziun e dafatta cun üna diminuziun da las frequenzas. In favrer 2011 ha la populaziun da Scuol decis perquai cun gronda majorità da renovar il büschmaint dal Bogn Engiadina a Scuol e da fabrichar üna nouva sauna attractiva.

Gronda festa dal BES

Il büschmaint dal BES es gnü renovà fingià l’on passa. La nouva sauna es gnüda realisada da mai fin avuost da quist on. In sonda passada ha la populaziun da Scuol e da tuot la regiun festagià la reavertüra dal BES ed impustüt eir inaugurà la nouva sauna moderna cun chant e musica ed ün vast program d’arrandschamaints per pitschen e grond. Ün grond nomer da spectatuors sun seguits a l’invid dal BES ed han tut suot ögl las innovaziuns. Eir la presidenta da la Regenza grischuna, Barbara Janom Steiner, ha gratulà per l’investiziun i’l Bogn Engiadina sco plü importanta spüerta tursitica da tuot on illa regiun. Eir per Jon Domenic Parolini, capo cumünal da Scuol e daspö quist on president dal cussagl administrativ dal BES, es l’investiziun statta necessaria per pudair darcheu concurrenzar i’l marchà turistic chi’d es actualmaing fermamaing suot squitsch. «La populaziun da Scuol ha demuossà ün orizont vast cun acceptar il credit d’investiziun da 6,6 milliuns francs», ha el declerà in occasiun da l’avertüra. Quist credit es nempe gnü acceptà antecipadamaing e la populaziun ha implü drivi l’acziunariat per ulteriuras persunas e cumüns da la regiun. Tenor Parolini han ils cumüns da Tschlin fin Ardez cun differents rapreschantants decis da’s partecipar al BES e suottastrichà uschè üna basa finanziala regiunala.

Il svilup va inavant

In occasiun d’üna discussiun da podi han manzunà ils partecipants l’importanza dal BES per tuot la regiun. A quista discussiun han tut part: Duri Bezzola, anteriur cusglier naziunal e dal 2002 fin dal 2012 president dal cussagl administrativ dal BES, Not Carl, dal 1983 fin dal 1998 capo cumünal da Scuol e fin dal 2011 vicepresident dal BES, Urs Wohler, directer da la destinaziun turistica Engiadina Scuol Samignun ed Ernst Bromeis, ambaschadur d’aua da la destinaziun ed iniziant dal proget «il miracul blau». La discussiun es gnüda moderada da Philipp Gunzinger chi’d es stat fin avant pac temp directer dal BES. Ils exponentes han bainschi lodà l’investiziun actuala, però eir rendü attent, cha per restar üna destinaziun turistica importanta cun cumpetenza da wellness nu sarà quai statta l’ultima investiziun e cha’l Bogn Engiadina Scuol stopcha adüna darcheu gnir sviluppà inavant. Intant però haja vaglü la paina da festagiar il pass ragiunt.

Autor: Nicolo Bass