La suprastanza da l’Uniun dals Grischs scriva, ch’ella es persvasa cha Duri Bezzola accumplischa tuot las premissas importantas per manar la Lia Rumantscha in quista fasa difficila e buollada da tensiuns: independent e fin qua liber dad intretschamaints cun las instituziuns rumantschas, vastas experienzas in dumondas da strategia e da gestiun, sensori ed abiltà per unir posiziuns cuntrarias, ingaschamaint sincer per la lingua rumantscha. Grazcha a sia professiun e sco deputà i’l Cussagl Grond ha el cumpetenzas remarchablas in dumondas da scoula e dispuona da la rait necessaria in e dadour il Chantun Grischun, scriva l’UdG. Illa dumonda dal rumantsch grischun in scoula sustegna Duri Bezzola cun persvasiun il model da coexistenza tanter idioms e rumantsch grischun.

La radunanza generala da l’UdG in avrigl 2012 ha decis da convochar üna radunanza extraordinaria da nominaziun in vista a la radunanza da delegats da la Lia Rumantscha dals 27 october 2012. In basa a las propostas entradas vegnan invidats e preschantats a quella ils candidats Duri Bezzola e Martin Mathiuet. Da decider ha la radunanza implü davart propostas per la rapreschantanza ladina illa suprastanza da la Lia Rumantscha.