La qualità dals arrandschamaints sports dürant il festival da musica classica nu stan in discussiun. Oscar Gulia es pianist e magister da clavazin a la Scoula da musica d’Engiadina Bassa/Val Müstair sco eir iniziant e manader artistic dal «Engadina Classica». Cun sias colliaziuns professiunalas i’l muond da la musica classica es el stat fingià da prüma davent – là amo suot il nom «Zernezer Musikwochen» – il garant per qualità musicala extraordinaria. In seis bilantsch dal festival «Engadina Classica» fa’l tanter oter attent al fat, cha artists sco la pianista taliana Beatrice Magnani opür ils solists dal «Concertgebouw Orchestra, Amsterdam» demonstreschan lur savair da solit be illas grondas salas da concert in tuot il muond. Cha pudair contemplar tals artists i’l auditori dal Parc Naziunal Svizzer a Zernez saja tuot oter co ün’evidenza, uschè Gulia. «L’atmosfera, il public fich interessà e concentrà e surtuot l’acustica tuottafat speciala i’l Auditori es da gronda qualità» ha confermà Gulia las reacziuns positivas dals artists e fat cler, cha el sco organisatur dal festival tegna ferm vi da la Destinaziun Zernez cun l’auditori sco perla.

 

Chi regna ün spiert da gronda classa culturala, quai han confermà eir quist on ils visitaduors dal festival cun lur attenziun ed applaus d’ovaziun. Quai chi manca tenor ils organisatuors es uossa amo il numer da visitaduors correspundent a la qualità musicala. Mezs adequats per ragiundscher quist böt pudessan esser üna megldra coordinaziun e comunicaziun. Quia pon gnir localisats ils puncts debels da l’organisaziun, voul dir il motiv pel relativmaing pitschen nomer d’interessents. 

E propi, il müdamaint dal nom «Zernezer Musikwochen» sün «Engadina Classica» as basa sül concept nouv chi ha reuni quist on eir il cumün da Scuol i’l rom dal festival. Cha’l nom es talian, e la broschüra d’infuormaziun es gnüda stampada in tudais-ch e suot squitsch da temp, nun amegldrescha la situaziun. Il sbagl evidaint però pudess tenor remarchas our dal public, esser stat il fat, d’avair ignorà las reglas dal marketing sainza far a savair a la regiun che chi capita ingio e perchè.

Dischillus s’ha muossà Gulia inavant da la resonanza mancada our dal ravuogl dals scolars da la Scoula da Musica Engiadina Bassa/Val Müstair. Per motivar als scolars ed a lur genituors da visitar ils concerts, vaivan ils organisatuors sport entradas a predsch redot. Eir la reacziun esitanta da l’hotelleria sün las pussibiltats cha’l festival pudess spordscher, dà da pensar a Gulia.

 

Tenor René Hohenegger, president cumünal da Zernez, ha Gulia orientà dürant la prümavaira sur da l’intent, da müdar nom e concept dal festival. Illa suprastanza cumünala s’haja alura in vista da la perdita d’exclusività cul müdamaint dal nom e l’intretschamaint da Scuol, scurzni l’import da sustegn pel festival da 5000 francs sün 2000 francs. Eir las incumbenzas dal coordinatur turistic, Flurin Bezzola, sun in quel connex gnüdas restrettas, sco cha Bezzola ha declerà. Per Hohenegger sun quai tuot decisiuns, chi stan illa respunsabiltà da l’organisatur. «Cha’l cumün nun ha interess vi d’ün tal evenimaint, nu saja vaira e quel imbüttamaint neir güstifichà», ha dit Hohenegger. 

Oscar Gulia metta in dumonda l’avegnir dal festival, adonta cha cun l’auditori dal PNS saja «avant man üna perla chi füss don da spredschar». A Scuol saja’l gnü tut sü cun bratscha’averta, conguala’l la situaziun.

Jon Domenic Parolini, capo cumünal da Scuol ha dit sün dumonda: «Nus nu vain gnü ingün intent, da tour davent alch a Zernez. Scha üna tala sporta vain aint da porta, lura es quai allegraivel». Parolini spera perquai inavant sün quista sporta ideala per prolungar la stagiun da stà.

 

Autor: Jon Duschletta