Daspö ün pêr ons es l’Uffizi da construcziun bassa chantunal (UCB) landervia a sanar in etappas la via dal Pass dal Fuorn. Pro l’Ova dal Sagl tanter la seguonda e terza gallaria sur Zernez vers il Fuorn as vaiva uossa sco chi ha dit Heinz Dicht, l’indschegner superiur da l’UCB, l’intenziun d’amegldrar la sgürezza pel trafic sün via s-chaffind ün spazi pella crappa chi crouda giò vers la via. «Cun allontanar mecanicamaing, cun üna maschina aposta, üna part dal grip sur la via s’ha distachà in mardi vers las 15.00 ün paquet da grippa da var 100 meters cubics dal grip survart ed es crodà giò sün via», ha manzunà l’indschegner superiur. Quist material ha sfrachà tras la paraid da lain e metal chi protegiaiva la via. «Per gronda furtüna nu’s rechattaiva ingün in quel mumaint sülla via in quel lö, uschè chi nun es capità inguotta.» In mardi vers saira ha güdichà ün geolog da l’UCB la situaziun ed ha constatà chi d’eira survart amo ün paquet da var 20 cubics grip loc chi ris-chaiva da crodar giò sün via. «Per minar giò eir amo quel paquet da grip, per cumadar la paraid da sgürezza e per rumir la via s’haja stuvü laschar serrada la via eir amo in marcurdi», ha infuormà Heinz Dicht, «in gövgia a bunura as güdichescha amo üna jada la situaziun e scha tuot es in uorden as poja drivir la via darcheu.» Il motiv pella bouda d’eiran, sco ch’el agiundscha, sfessas zoppadas in quist grip sur la via dal Pass dal Fuorn.

 

Autor: ANR