Cha cugliers federals vegnan a visitar il Parc Naziunal Svizzer (PNS) e lodan quel eir in quellas occasiuns es important per Hans Lozza, il respunsabel da comunicaziun dal PNS. «Quia illa regiun vegna suvent schmanchà cha la Confederaziun ans sustegna minch’on cun passa trais milliuns francs», declera Lozza, «nus survgnin eir fit per nos territori e quai grazcha als contrats chi sun gnüts fats tanter il PNS e la Confederaziun.» El intuna cha oters parcs nu survegnan ün tal sustegn. Cha d’avair üna buna relaziun cun las instanzas las plü otas dal pajais saja perquai important ed eir in ün tschert möd evidaint.

Na be ün’instituziun da marketing

Cha la situaziun turistica ed economica nun es pel mumaint la megldra, bada eir il PNS: Damain giasts in lur center d’infuormaziun e damain giasts i’l parc svess demuossan quai mincha di. «Grazcha a nos giubileum da 100 ons pudaina però far gronda reclama per noss’instituziun e per nossa regiun», disch Lozza e manaja cha quai nu saja be ün zücherin pel turissem regiunal, dimpersè «ün zücherun». «Cun nos giubileum pudain nus ans preschantar a la pressa regiunala, naziunala ed internaziunala», argumentescha’l. E quai saja tenor el üna situaziun unica chi nu’s haja minchadi. Cha perquai gnia uossa eir dat grond pais a la preparaziun da la festa da giublieum. La perscrutaziun nu vain tenor el però negletta. «Insè fan las universitats quai per nus», declera’l. Ultra da quai es gnüda ingaschada d’incuort üna persuna chi güda a coordinar las lavuors scentificas pel PNS e chi’d es, sco ch’el disch, landervia – in occasiun dal giubileum da 100 ons – a far il atlas dal PNS. «Quai es eir ün proget chi cuosta ün mez milliun francs e chi’d es ün prodot chi’s po vender ed es popular sco l’ediziun da nossa broschüra Cratschla», declera Lozza.

Differents müdamaints da persunal

La cumischiun federala dal PNS ha tenor ledscha nouv commembers. Per la fin da l’on da gestiun han demischiunà quatter da quels, nempe: Daniel Cherix, Irene Knüpfer, Gervas Rodigari e Silva Semadeni. Uossa as cumpuona la cumischiun federala da Robert Giacometti da Zernez, (president), dals rapreschantants da la Confederaziun Christine Meier da Turich e Franz-Sepp Stulz da Tafers (vicepresident), dals rapreschantants da la Pro Natura Rosmarie Eichenberger-Hauri da Rodersdorf, Catherine Stehler Perrin da Grandson e Urs Tester da Bottmingen. Ils rapreschantants da l’Academia per scienzas natüralas da la Confederaziun sun Yves Gonseth da Neuchâtel e Jürg Pfister da Münsingen. Il rapreschantant dals cumüns dal PNS es Renè Hohenegger, president cumünal da Zernez.

Dürant la radunanza annuala da la cumischiun federala dal PNS es gnü onurà Flurin Filli dad Ardez, fin quia adjunct scientific e manader dal ressort perscrutaziun. El maina a partir da quist on la sparta gestiun e monitoring dal PNS. Mario Negri da Chapella, anteriur guardian dal PNS e manader e respunsabel da plüs sectuors tecnics ed administrativs dal PNS ha demischiunà davo 30 ons sia plazza da lavur in accord vicendaivel culs respunsabels dal PNS. Davo 16 ons ingaschamaint sco secretaria dal PNS ha Erika Zimmermann dad Ardez bandunà sia plazza da lavur. Ella vain uossa rimplazzada da trais secretarias chi han insembel ün pensum da lavur da 150 pertschient. 

Autor: ANR

Foto: Hans Lozza/PNS