Gian Battista Danz-Christandel, Tschierv

Fr, 21. Sep. 2012

In lündeschdi, ils 2 lügl as ha radunada sül prà davo la baselgina da Tschierv üna gronda raspada funebra per tour cumgià da Gian Battista Danz-Christandel.

Gian Battista Danz-Christandel, Tschierv Necrolog In lündeschdi, als 2 lügl as ha radunada sül prà davo la baselgina da Tschierv üna gronda raspada funebra per tour cumgià da Gian Battista Danz. Dürant il cult divin cul pled commovent dal ravarenda ed ils pleds dal vegl mastral Albin Prevost ed il mastral Gottfried Hohenegger as preschantet il prà il lö da tour cumgià, sco ün spejel chi documainta in ün möd fich realistic il gir da la vita da Gian Battista Danz. Il prà vert amo bel frais-ch cun l’erba chi crescha danouvmaing davo chi d’eira gnü fat cul fain. Il sulai splenduriva in intervals, el gniva cuvernà cun nüvlas s-chüras, zoffels chi portaivan la plövgia e la daracha, e be subit davo darcheu raz da sulai sublims chi fan bain, s-chodan e dan curaschi. Uschè es bain eir statta accumpagnada la lunga vita da Gian Battista Danz. El es creschü sü in üna famiglia intacta beada cun tschinch uffants. Ma fingià bod es la famiglia gnüda sdarlossada tras la perdita d’ün da lur uffants, e la mort da seis frarin Silvio ha chalchà fich a Gian Battista. Davo avair gnü frequentà la scoula obligatorica, as decidet il giuvnot da lair imprender il manster da falegnam. Il giarsunadi ha el fat pro Maini Pitsch a Tschierv. Davo ha el lavurà pro Josef (Bepin) Honegger a Fuldera. L’on 1943 es el entrà illa lai cun Ida Christandel chi lavuraiva a Tschierv pro la famiglia Maini Stupan. Dal 1944 es nada lur figlia Silvia e dal 1947 il figl Mario. Per els sun que stats bels ons, eir scha Gian Battista vaiva suvent d’entrar in servezzen militar activ dürant la seguonda guerra mundiala. Sper seis manster da falegnam faiva el eir da paur. Qua gniva el sustgnü da seis quinà Hansep chi’d es restà fidel a la famiglia fin ch’el es mort. L’on 1949 ha Gian Battista Danz insembel cun sia duonna Ida surtut la posta e manà quella 30 ons fin al di da sia pensiun. Sco postin e manader da la posta han Gian Battista e sia duonna Ida fat tras tuot il svilup tecnic e bürocratic cha la gestiun da posta ha portà cun sai. Eu til n’ha amo hoz avant ögls cur ch’el portaiva e spartiva oura la posta. Ils prüms ons natüral a pè tras tuot il lung cumün da Tschierv, plü tard vaiva seis figl Mario pisserà per ün töffin. Que d’eira per el ün grond surleivg. Adüna es el gnü assisti da sia duonna. Las grondas müdadas chi seguittan üna davo tschella, il telegraf es svani, il telefon es gnü privatisà ed il computer, ils mezs digitals sun entrats aint il büro da posta. Per furtüna as ha svilupà quel temp bursacus güst cur ch’el ha pudü ir in pensiun e surdar la gestiun da la posta a seis figl Mario insembel cun sia duonna Helga. Cun seis far calm bain ponderà gniva el predschà da tuot la populaziun, uschè ch’el es gnü tschernü dal 1946 sco president cumünal, e schef capo secziun. Dal 1977 fin 1981 es el stat mastral, e president da fabrica pro l’ingrondimaint da l’ospidal Val Müstair. Impü es el stat dürant 30 ons administradur da la chascha d’amalats publica Val Müstair. Tuot quai ch’el pigliaiva per mans ha el fat cun plaschair e grond ingaschamaint. Ma in sia lunga vita es el eir gnü cunfruntà cun gronds pissers e dischplaschairs. Ün greiv cuolp es bain stat la dandetta mort da sia duonna Ida l’on 1994. Ma eir la mort in giuvna età d’üna da sias abiadias til ha buollà e chalchà. Grazcha a la gronda premurusa chüra da seis uffants ed il grond plaschair cun seis abiadis e bisabiadis es el stat bun da surmuntar plan planet il cordöli. Ils ultims ons tschessaivan las forzas e las deblezzas da l’età han portà pro ch’el d’eira dependent d’ün agüd e fliamaint permanent. Grazcha a la gronda premura da seis uffants ed inpustüt il grond agüd da sia brüt Helga ha el pudü viver aint il ravuogl da la famiglia fin cuort avant sia mort. Ils ons passettan e sia vita es statta richa ed accumplida cun tuot quai ch’üna vita po dar ed eir tour. Nus lain esser grats ed ingrazchar per tuot quai cha Gian Battista ans ha dat. Üna gronda persunalità, üna da la veglia generaziun cun ün grond savair ans ha bandunà per adüna. Reposa in pasch.

Autor: Oswald Toutsch

Kategorie: 

KOMMENDE EVENTS

STELLEN

IMMOBILIEN

DIVERSES