Il Club da golf Vulpera chi’d es gnü fundà dal 1923 es ün dals plü vegls da la Svizra ed es amo adüna fich activ. Sper lur sporta da giovar a golf organiseschan ils respunsabels dal club adüna darcheu eir turniers da golf. Per animar ad indigens da giovar a golf e per survgnir nouvs commembers dal club vegnan sportas uras d’insaj. Minch’eivna la sonda tanter las ündesch e mezdi instruischa il magister da golf da Vulpera, Paul Hodgson, als interessats. «Nus lain dar impustüt ad indigens la pussibiltà da far ils prüms pass i’l sport da golf», ha’l declerà. Premissa es cha’ls partecipants nun hajan amo mai giovà a golf. «Las uras d’insaj nu dessan esser lecziuns da golf», ha orientà il manager dal Club da golf Vulpera, Markus Vesti. Las uras d’insaj sun gratuitas ed ils bastuns e las ballinas vegnan missas a disposiziun dal club. «Ils prüms raduond 20 minuts vain declerà il sport da golf e davo po minchün provar cun l’instrucziun dal magister da far ils prüms pass in quist sport.» Ils partecipants piglian part a las uras d’insaj cun büschmainta adattada e cun s-charpas da gimnastica.

 

Grond pais mettan ils respunsabels dal club ad ün bun deport e cuntgnair, e quai internamaing e vers l’extern. Quai vain adüna darcheu manzunà pro las radunanzas ed eir pro’l scumpart da premis dals turniers, e quai tant dal president Men Mischol sco eir dal chapitani Schimun Denoth. La plazza da golf appartegna a la Golfplatz Vulpera AG ed il Club da golf Vulpera es fittadin e manader da gestiun. Aint illa chasa da golf as rechatta eir ün restorant. Qua sun bainvgnüts golfists e na golfists. Il club dispuona fingià daspö blers ons da magisters da golf, uschenomnats ‘Golf Pro’. Pel mumaint es quai Paul Hodgson chi maina eir las uras d’insaj e po dar da principi davent buns tips. Sco cha Vesti ha orientà, sun ils cuors d’insaj bain frequentats ed ils respunsabels speran, «ch’ün pêr dals principiants restan pichats e dvaintan forsa üna jada commembers dal club». Tenor las infuormaziuns da Vesti dombra il Club da golf Vulpera var 300 commembers. 

 

Autor: ANR