Daspö december da l’on passà sun ils lets da la clinica da burnout a Susch occupats plainamaing. Tenor Matthias Bulfoni, president dal cussagl admini-strativ da la Clinica Holistica Engiadina SA, exista regularmaing üna glista d’aspet cun raduond 50 paziaints chi spettan fin trais mais per gnir tuts sü illa clinica. Davo bundant duos ons es il success da la Clinica Holistica a Susch bler plü grond co aspettà. «Nus vain il prüm bainschi gnü fadia. Però da quel mumaint, cha la clinica es gnüda integrada sülla glista d’ospidals es il success be amo creschü», infuormescha Bulfoni. Uschè vaivan ils respunsabels per exaimpel planisà da s-chaffir var 30 nouvas plazzas da lavur. Hoz dombra la Clinica Holistica fingà 45 plazzas cumplainas. Fingià pac temp davo l’avertüra ha la clinica stuvü tour a fit locals da la chasa da scoula veglia da Susch per spordscher avuonda lö da terapia. «Eir uossa es la clinica massa pitschna e nus vain stuvü tscherchar üna soluziun», declera il president dal cussagl admini-strativ. 

 

Tenor Matthias Bulfoni haja dat differentas variantas per ün ingrondimaint. «Nus vessan gnü versaquantas dumondas per realisar üna seguonda clinica da burnout in ün oter Chantun», quinta l’iniziant da la Clinica Holistica. Uschè vess Bulfoni pudü vender l’idea e’l concept ed oters vessan realisà üna nouva clinica. «Nus vain però eir survgni offertas d’üna vainchina da hoteliers in Engiadina per surtour lur stabilimaints.» Bulfoni s’ha miss aint per üna soluziun a Susch e savü da persvader il cussagl administrativ. Uschè es gnü suottascrit in marcurdi davomezdi il contrat da cumprita pel Hotel Steinbock a Susch. «Quist hotel es in vicinanza da la clinica e las investiziuns sun survisiblas», quinta’l. I’l anteriur Hotel Steinbock dessan gnir realisadas intuot 20 stanzas per 15 fin 20 nouvs paziaints e ses fin set locals da terapia implü. «Cun quist ingrondimaint da la Clinica Holistica vegnan s-chaffidas ulteriuras 15 plazzas da lavur», disch Bulfoni. Quai voul dir cha la Clinica Holistica spordscha in avegnir 60 plazzas da lavur cumplainas. Per la cumprita da l’Hotel Steinbock e per l’adattamaint da fabrica cun ün’infrastructura d’ota qualità, voul la Clincia Holistica Engiadina Sa investir raduond 2,5 milliuns francs. 

 

Adonta da bunas offertas per vender il concept da la clincia da burnout in oters chantuns da la Svizra, es l’iniziant Matthias Bulfoni persvas dal lö Susch e da l’Engiadina Bassa. «La clinica ha s-chaffi infra cuort temp ün bun nom cun buna qualità e quai maina alch a tuot l’Engiadina Bassa», es el persvas. La spüerta da la clinica ha eir persvas dürant quists ultims duos ons cun success e quai es, tenor l’iniziant, la megldra reclama per implir ils lets. «Il prüm vaina gnü gronds cumbats cullas chaschas d’amalats. Però intant sun eir quellas persvasas da la spüerta e racumandan nos concept da terapia», quinta’l. Ed ils feedbacks dals paziaints sun impreschiunants e fan plaschair a Bulfoni. «Ils paziaints pon tuornar davo trais fin quatter eivnas in lur ambiaint e cumanzar darcheu a lavurar. Quai es il meglder attest da prestaziun.» E las allgordanzas cull’Engiadina Bassa sco regiun da sandà restan perquai in buna memoria. La spüerta da pionier da la Clinica Holistica s’ha etablida e la via da success cul ingrondimaint es tenor el garantida. 

 

Autor: Nicolo Bass

Foto: Clinica Holistica Engiadina SA