Il cumün da Zernez crescha ad ün crescher. Nouvs quartiers d’abitar sun gnüts realisats. Dürant ils ultims duos ons sun gnüdas fabrichadas numerusas chasas ed abitaziuns. Ellas sun per gronda part abitadas da famiglias indigenas. «Quist fat es allegraivel – el pissera però eir, chi’s sto adattar l’infrastructura cumünala», disch il president cumünal da Zernez René Hohenegger. «Davo chi s’ha fat sclerimaints in detagl esa evidaint cha la scoula sto gnir adattada a quists bsögns nouvs», e’l persvas. 

Dar scoula in containers nu va plü

La populaziun da Zernez es creschüda dürant ils ultims duos ons per raduond 100 persunas. Ils uffants da quellas persunas van in gruppa da gö, a scoulina o a scoula. «Intant es la situaziun davart las localitats per instruir a tuot ils scolars a Zernez amo survisibla», disch Hohenegger. Quai cumbain chi s’haja fingià stuvü far da tuottas sorts schaschins. Uschè sun scolars gnüts instruits per part in containers, ston müdar chasa per gnir instruits in roms specials e douvran l’anteriura aula sco stanza da scoula. «Quai dà malcuntantezza pro la magistraglia, pro uffants e genituors pertocs».

Pro las ponderaziuns schi fa insomma dabsögn d’ingrondir la chasa da scoula da Zernez giouva il cumün dad Ardez üna rolla importanta. Davo cha la fusiun dals cumüns da Guarda fin Zernez es gnüda refüsada e cha’l cumün dad Ardez ha il giavüsch da fusiunar «vers ingiò» as stoja far quint ch’eir ils scolars dal s-chalin ot da la scoula dad Ardez giajan a Scuol a scoula. «Scha quai capita as müda nossa situaziun schon ün zich», disch Hohenegger. Tenor las evaluaziuns fattas per l’avegnir e las cifras d’experienza preschaintas nu müdess quist cas però il bsögn dad ingrondir la scoula. «Insembel culla presidenta dal cussagl da scoula, Monika Toutsch-Gredig, n’haja tut suot la marella ils detagls ed insembel eschna gnüts a la conclusiun, cha per il plü tard l’on da scoula 2014/15 sto la scoula a Zernez esser ingrondida», usche Hohenegger.

Factuors negativs illa decisiun

Ün ulteriur fat chi ha pretais ponderaziuns in connex cun l’ingrondimaint da la scoula da Zernez es tenor Hohenegger, eir la votumaziun dal pövel svizzer dals 11 marz, davart la realisaziun da seguondas abitaziuns. La consequenza da quella decisiun pudess esser sül sectur da fabrica l’abolisaziun da diversas plazzas da lavur ed uschea eir üna diminuziun da la populaziun illa regiun: «Schi nu sun avantman plazzas da lavur as stoja ir in tschercha da lavur in otras regiuns», argumentescha’l. Causa chi nu’s sapcha però precis co cha l’avegnir sül secur da fabrica as sviluppa, nu’s possa neir trar fingià uossa decisiuns in chosa. «Ma Zernez es ün cumün chi viva dal turissem e da la mansteranza», renda’l attent. Quistas ponderaziuns nun han a la fin da las examinaziuns influenzà fermamaing il resultat. Intant ha üna gruppa da lavur dal cumün da Zernez fat ün stüdi chi’d es gnü examinà da la suprastanza. In seguit gnaran surdattas quellas lavuors preparatoricas per la submissiun da la planisaziun. 

Autur: anr