Il paschiuno paur Arthur Fontana da Chapella posseda och chevras da la razza ‘Saanen’. Quella sort da chevr’alva cun pagl cuort deriva dal Saanenland e dal Obersimmental i’l chantun Berna. «Quella razza es eir tar nus in Engiadina deraseda e fich adatteda per nossa cuntredgia», disch il paur. Causa cha l’Engiadin’Ota nu posseda pü üngünas alps da chevras ho il paur la pussibilted da lascher pasculer sia scossa sün ün pas-ch chi tuocha a la vschinauncha da S-chanf illa Val Susauna.

 

Fingià da mat fascinaivan ad Arthur Fontana las bes-chas. El es creschieu sü a Chapella in üna famiglia paurila. Cur cha sieu bap es gnieu pensiuno ho’l surpiglio la pauraria. Sper sia lavur scu impiego da la ferrovia retica ho’l pissero insembel cun sia famiglia per il bainster da vachas, bês-cha, chucals e chevras. Hoz es el pensiuno ed ho ün’eted da 73 ans. «Eau d’he adüna gieu paschiun per las chevras e perque d’heja auncha hoz och bellas silas», disch el. Scu ch’el intuna nu füss el bun da ster tuot il di giò per cuotscha. Sch’el nun es güsta fatschendo cun sias chevras schi ho’l da tuottas sorts lavuors da fer. «Sfender laina e fer cul fain tuochan eir tar mias lavuors, basta ch’eau possa adüna tambas-cher qualchosa, e lura suni cuntaint», agiundscha il paur pensiuno.

 

Cun tuot las oras vo Arthur Fontana duos voutas al di sül pas-ch tar sias chevras. Quellas stöglian gnir munsas ed il paur las meladüsescha cun ün zuogl fain e paun sech. Il di cumainza per el a bunura a las ses. Da quellas uras as metta’l in viedi cun sieu gip vers Guandscheras. Aint in sieu veicul ho’l duos brentas cun ova fras-cha. «Displaschaivelmaing nun ho que sül pas-ch üngün’ova causa cha la funtauna es vi dal staliver», disch el. Zieva ch’el ho muns las chevras vaun quellas sül pas-ch. «In quists mumaints am pera cha’l temp saja sto salda ed a me vain adimmaint cur ch’eau giaiva svessa scu iffaunt a perchürer las chevras», quinta Fontana. Zievamezdi intuorn las quatter es darcho ura da mundscher. Sur not lascha il paur las chevras aint in stalla ed uschè es eir el pü quiet scha sias silas sun suot tet. Cul lat fo la duonna da l’amatur da chevras chaschöl. «Quel chaschöl vain predscho da tuot la famiglia», intuna il uschedit chavrer.

 

Autor: ANR