L’ensemble «Implant da cura Scuol-Tarasp» nu vain a pasch. La chasa da cura, hoz cuntschaint sco Hotel Palace Scuol, vala sco l’ouvra la plü importanta da l’architect Svizzer Felix Wilhelm Kubly. Il stabilimaint istoric es gnü fabrichà dürant ils ons 1861 fin 1865 immez l’epoca classica dal turissem da bogn e vala sco prüm Grand-Hôtel d’Engiaina Bassa. 

La fundaziun Nairs sco portadra dal center d’art ha elavurà dürant ils ultims mais üna visiun pel mantegnimaint e l’integraziun da l’Hotel in ün proget nomnà «Global Village for the Arts». Quist proget es gnü preschantà in üna broschüra. Tenor quella lessan ils iniziants crear a Nairs ün «cumün global d’art» chi correspundess ad üna interpretaziun moderna da las istoricas colonias d’artists. 

 

«Center for Intercultural Dialogues» (CID) as nomna üna visiun accumpagnanta. Quist center per dialogs interculturals dess gnir inoltrà il center d’art contemporana Nairs e garantir üna rait da colliaziun tanter Nairs ed universitats e scoulas otas sün tuot il muond. I’l context d’üna globalisaziun da la cultura stan eir ils conzepts d’adöver e da gestiun da l’hotel. Uschè es planisà da trar a nüz circa la mittà dal stabilimaint sco hotel d’abitar e d’atelier per artists. Quists ateliers dessan gnir fittats per üna dürada tanter trais e dudesch mais l’on. Pussibels interessents sun tenor la broschüra pajais da tuot il muond, fundaziuns o societats d’artists. 

Ün hotel da cultura e da la giuventüna dess gnir s-chafi our da l’otra mittà dal stabilimaint. Cun predschs moderats dess gnir pussibiltà a glieud giuvna da gnir in Engiadina Bassa e passantar quia lur vacanzas in ün rom unic, tanter natüra ed art. 

L’entrada da l’hotel, il uschenomnà «Vestibül», dess tenor ils iniziants dal proget gnir adatada e drovada sco restorant per las duos parts da l’hotel. Il restorant dess però eir esser avert publicamaing.

Il sömi «Kraftort Nairs» va però amo inavant e prevezza da crear our dal implant d’üert da Nairs ün Alpineum. In quist’opera d’art giardiniera sun integradas tuot las plantas da l’Engiadina, muossand uschè ün exaimpel da biodiversità unica. 

 

 Il Fögl ufficial dal chantun Grischun ha publichà als 30 avuost l’inchant da l’Hotel Scuol Palace pels 16 november. Quist es fingià il terz tentativ da trar ün strich suot l’affar spinus. La Friedman scrl sco possesura da l’Hotel Scuol Palace es debitura da la societa simpla Clemgia Tarasp da la G. Testa & Fratelli Triacca AG, sco creditur i’l prüm rang. Quist fat ha confermà Markus Testa sün dumonda. El ha suottastrichà invers la Posta Ladina sia confessiun invers il proget «Global Village». El svess haja proponü invers Urezza Famos da la fundaziun Nairs d’incuort üna via constructiva chi prevezza d’evitar il fallimaint. Tenor Testa vess la fundaziun Nairs stuvü inchaminar la via da conclüder cun la Friedman scrl ün contrat da prevendita a favur d’üna nouva fundaziun. L’import da quista prevendita d’eira previs per desch pertschient da la summa averta da 4,5 milliuns francs. «Invezza da perder 80 pertschient dal investiziun, vessan tuots paja 30 pertschient da tal a la nouva fundaziun», declera Testa. La dita G. Testa & Co da San Murezzan svessa as vess partecipada cun 200'000 fin 300'000 francs ad üna tala soluziun. «Tuots vessan surv-gnü lur raps» es Testa persvas. El spera uossa, cha l’inchant sforza a la Friedman scrl d’acceptar üna tala cunvegna da precumpra.

Jon Domenic Parolini, capo cumünal da Scuol, spera chi gnia tantüna a quist inchant. Sco ch’el ha comunichà sün dumonda, gniss uschè scholt il problem finanzial ed insomma creà «fatti chiari». Il proget da la fundaziun Nairs füss per Parolini üna schanza unica per Scuol, Nairs ed eir per l’intera regiun. Tenor Otto Huber da l’Uffizi da scussiun En a Sent füss invezza per tuot ils pertoccats plü elegant, schi’s chattess ouravant amo üna soluziun cun mans e peis. «L’inchant es per tuots la plü noscha soluziun, na per ultim eir per la Friedman scrl» es Huber persvas. Per interrumper l’inchant sto però esser sün maisa ün contrat suottascrit, ed eir inscrit i’l cudesch fundiari, muossa Huber la via per eventuals interessents.

 

Üna gruppa d’interess es la fundaziun Nairs insembel cun la fundaziun Edith Maryon da Basilea. In vista a lur agens progets da sanaziun dal center d’art, nun ha la fundaziun Nairs suletta ils mezs finanzials per cumprar svessa l’hotel, ha confermà Urezza Famos, commembra dal cussagl da la fundaziun e promotura da la visiun «Global Village». Daspö divers mais tratta qui-sta gruppa cun la Friedman scrl la cumprità da l’hotel. Els sun uossa intensivamaing in tschertscha da mezs finanzials. «Nus lains però be avair da chefar cun persunas chi han ün’affinità adattada per quist proget visiunari e fich important per nossa regiun», restringia Famos il chomp da pussibels investuors.

 

Autor: Jon Duschletta