Sco in blers oters cumüns exista eir a Zernez üna gruppa da gö ed üna gruppa da gö da god. 21 uffants han la pussibiltà da far lur prümas experienzas illas spartas socialas, linguisticas e motoricas. Els fan lur prüms pass vers l’independenza. Illa località da la gruppa da gö, chi vain missa a disposiziun dal cumün da Zernez, pon ils uffants giovar e zambriar da cumpagnia. La gruppa da gö da god invezza spordscha duos uras l’eivna our il liber. Na be pels uffants ha cumanzà üna nouva sfida, dimpersè eir per Anna Notala Mischol, manadra da la gruppa da gö, ed Anna Tina Werro, manadra da la gruppa da gö da god. Las duos manadras han surtut quista carica per la prüma jada.

 

Ils uffants sun partits in trais gruppas. Minch’uffant ha la pussibiltà da tour part a la gruppa da gö üna jada l’eivna o tenor giavüsch eir plüssas jadas. Dürant duos uras, saja quai a bunura o la davomezdi, imprendan ils uffants a giovar insembel e tour resguard ün a tschel. Zambriar da cumpagnia saja eir important per l’uffant, sco cha la manadra Anna Notala Mischol declera. Zambriond as sviluppa la creatività e la motorica da minchün. Els imprendan eir simplas chanzuninas e versins cun movimaints. Cun üna pitschna marenda da cumpagnia vöglian las manadras ragiundscher cha’ls uffants imprendan eir a partir ün cun tschel. Els fan experienzas importantas illa gruppa: «Schoglier conflicts in möd constructiv, ragiundscher alch insembel ed impustüt avair bler plaschair», disch la manadra da la gruppa da gö.

 

La manadra da la gruppa da gö da god, Anna Tina Werro, maina la gruppa üna jada l’eivna our il liber. Là vegnan ils uffants ad imprender a cugnuoscher la natüra dürant tuot l’on cun sias differentas stagiuns. Da prümavaira las prümas minchülettas, da stà il sulai chi splendura, d’utuon las föglias culuridas chi croudan da la bos-cha e d’inviern ils prüms flöchins da naiv chi cuvernan las vias. «Il chant d’utschels e da bes-chas chi’s doda e’s vezza chaminond tras il god, vain declerà e muossà in möd cha mincha uffant inclegia», disch la manadra. Dürant il davomezdi aint il god vain giovà libramaing cun tuot quai chi dà illa natüra.

 

Autor: ANR