«Cur cha nus eschan gnüts a savair cha Günther e Christiane finischan da lavurar pel Chastè da cultura vaivna schon spranza cha otras persunas s’interessan per quellas plazzas da lavur», disch il president da la Società Chastè da cultura Fuldera Aldo Rodigari. Chi nu saja però capità bler in quella direcziun e cha perquai s’hajan cumanzà a far pissers ils respunsabels dal lö cultural a Fuldera. «Il plü simpel füssa stat da laschar chi tuna e da retuornar il stabilimaint al cumün», declera’l, ma cha quai füss i a cuost da la vita culturala in cumün e cha quai nu possa bain na esser il böt final.

Mincha bun’idea es bainvisa

Davo cha’ls respunsabels da la Società Chastè da cultura Fuldera vaivan organisà ün inscunter culs gremis politics, turistcs, culturals e la Biosfera Val Müstair esa dvantà evidaint: Ingün nu giavüscha cha l’anteriura chasa da scoula resta vöda. «Nus dovrain vita in cumün ed impustüt vulaina spordscher da tuottas sorts arrandschamaints chi suottastrichan nossa cultura», disch Rodigari. Grazcha al sustegn da la Biosfera Val Müstair e quel dal Cumün da Val Müstair vain in schner organisà ün lavuratori. Quel vain manà da duos persunas externas chi fan cussagliaziuns. Sco cha Rodigari disch as giavüscha cha pro quel inscunter as partecipeschan tanter 20 e 30 persunas. E quai dessan esser persunas interessadas ad arrandschamaints culturals o persunas chi han experienza cun organisar svess da quels. «Mincha idea, mincha tip e mincha sustegn ans es fich bainvis ed ans fa grond plaschair», intuna’l. Perquai fa’l eir in quist’occasiun ün appel a tuot las persunas interessadas da s’annunzchar pro el.

Arrandschamaints da tuot gener

Las localitats dal Chastè da cultura a Fuldera sun adattadas per da tuottas sorts exposiziuns, concerts, preschantaziuns da teaters, prelecziuns e bler oter plü. L’anteriura chasa da scoula as preschainta cun plüssas stanzas grondas, ün’aula cun palc ed ün’atmosfera unica. Eir societats pon tour a fit las localitats per s’inscuntrar o per as preschantar. «Quai cha nus fain in mincha cas amo es la grond’exposiziun da Nadal ingio chi’s preschantaran darcheu blers artists indigens», disch Rodigari. El as giavüscha però cha da quels arrandschamaints possan gnir organisats eir in avegnir. «Il Chastè da cultura es intant dvantà cuntschaint ed i füss bain puchà sch’el stuvess serrar sias portas», accentuescha’l.

Persunas chi han interess da’s partecipar activamaing a l’avegnir dal Chastè da cultura e per da quellas chi han simplamaing üna bun’idea co chi’s pudess sustegner la cultura a Fuldera, pon telefonar ad Aldo Rodigari, telefon 081 851 66 63. 

Autura e fotografia: ANR/Martina Fontana