«Pro arrandschamaints chi’s repetan minch’on sco l’amen in baselgia, exista ün pa il privel cha la partecipaziun giaja al main», esa gnü dit fingià avant ons dals respunsabels da la Festa e marchà da racolta in Val Müstair, la quala vain organisada minch’on. Però eir per quist on nun han ils organisatuors e las persunas chi vöglian vender e preschantar lur prodots d’avair temma. Fingià uossa esa cuntschaint cha pro passa 60 stands da marchà as pudaraja cumprar da tuottas sorts robas fattas a man o giodair buntats genuinas. Quist on stan la Festa ed il marchà da racolta da la Val Müstair suot il motto «Tour de Ski 2013». Perquai as vezzaraja pro’l cortegi dal sgüra l’ün o l’oter sujet chi ha da chefar cul star da passlung indigen Dario Cologna o cul sport da passlung in general. Üna gruppa da persunas oriunda dal Tirol dal Süd chi schloppa la giaischla pisserarà per ulteriur trategnimaint.

Ultra dal grond cortegi ed ils blers stands da marchà es la Festa cul marchà da la racolta eir cuntschainta per sias concurrenzas. Uschè as pudaraja in dumengia davomezdi far part svess o simplamaing giodair la concurrenza da mundscher. Paurs e na paurs cumbattaran in quell’occasiun per rangs e titels. Eir in dumengia davomezdi gnaraja dat cuntschaint chenün uffant chi ha guadagnà la concurrenza da pittürar disegns. Quella sta suot il motto «100 ons electrificaziun in Val Müstair». Las entradas chi vegnan generadas dal organisatur da la Festa e marchà da racolta Val Müstair vegnan quist on surdattas als respunsabels da l’organisaziun da la «Tour de Ski 2013».

Ün program varià

Sco chi tocca pro üna festa da racolta, cumainza il di da festa als 7 october cun ün cult divin ecumenic visavi l’ustaria Lai da Rims a Valchava. Fingià a partir da las 11.30 as pudaraja contemplar il cortegi da differentas societats. Quel maina tras cumün ingio chi’s rechattan lung la via eir ils passa 60 stands dal marchà. A las 15.00 es il final da la concurrenza da mundscher e la premiaziun dal plü bel disegn dals scolars. Per uffants vain spüert ün program special chi cumpiglia tanter oter eir l’ir culla charozza d’asens o pitturar vistas.

Autura e fotografia: Martina Fontana