Heinrich-Christian Joos, 1937–2012

Mo, 22. Okt. 2012

Heinrich-Christian Joos es nat als 5 november 1937 a Silvaplauna. Passanto cun quatter fradgliuns sia infanzia ed in l’eted da tschinch ans pers sieu bap. La mamma es resteda suletta culs iffaunts.

Che sacrifizis ch’ella ho stuvieu surpiglier – impustüt düraunt ün temp da granda crisa – es be d’admirer. Silvaplauna d’eira quella vouta üna pitschna vschinauncha paurila circundeda da bels pros ed ils lejs be frequentos da pas-cheders indigens. Ün paesagi cha Heiri, scu ch’el gniva clamo, mê ho schmancho. Cun pissers ho el perseguito il traffic s-chadagno e la cuttüra blesseda da stabilimaints da speculaziun surdimensiunos. Heiri ho frequento la scoula primara a Silvaplauna e quella da la secundara cun grand entusiassem a San Murezzan. Il giarsunedi da mecanist da precisiun, specialiso sün armas, ho el conclüs a Thun. Dal 1957 as stabilit il defund a Zuoz, per surpiglier üna plazza a l’arsenel da S-chanf. Dal 1966 as marida el cun Hanna Aeschlimann per gnir bap d’üna matta e d’ün mat. In sia operusited al chattains eir düraunt circa trais decenis scu cussagl ed eir scu president da la raspeda evangelica. Heiri as inserviva adüna d’üna buna lingua cun grand s-chazzi da pleds. Interessantas discussiuns gnivan fattas, algords ed anecdotas da Silvaplauna ans pudaiva udir. Suvenz gniva tuot accumpagno d’üna frasina plütschönch melcotta; que d’eira Heiri. Cur cha la stagiun da tir d’eira glivreda, gniva penso a Heiri. L’arma gniva purteda a l’arsenal per l’impalmer in mauns competents. Cun ün per manövers gniva piglieda dapêr l’arma e cun ün per marmuogns suot vusch as pudaiva udir: «Tü est chüra da tieu schluppet!» che cumplimaint pel tregant. El vo a chesa per avair zieva ün per dis ün’arma scu nouva, grazcha a Heinrich-Christian Joos. Florio Tognoni

Kategorie: 

KOMMENDE EVENTS

STELLEN

IMMOBILIEN

DIVERSES