«Nus vain constatà chi regna in cumün üna tscherta malcuntantezza», disch il president cumünal da Zernez René Hohenegger. Chi sajan gnüts fats rimprovers ed intant eir inoltradas duos iniziativas chi conferman lur impreschiun. Quantas persunas chi sun propcha «malcuntaintas cun la politica da Zernez» nu’s poja tenor il capo però eruir in detagl. Las iniziativas sun gnüdas suottascrittas da passa sesanta persunas – ma cha pro tuottas duos as tratta plü o main da las listessas persunas.

Planisaziun da quartier a Muglinè

Sco cha Hohenegger declera es gnüda inoltrada al cumün da Zernez ün’iniziativa chi pretenda da nu far pel quartier da Muglinè üna planisaziun da quartier. Quella pretaisa nu po il cussagl cumünal però accumplir: «Nus vain da respettar las ledschas chantunalas e federalas», tira el adimmaint, «e quai cumbain cha differents indigens vulessan gugent fabrichar subit chasas ed edifizis per firmas in quel quartier chi’d es fixà sco quartier dad abitar e man-steranza.» Causa cha a seis temp es la surfabricaziun dal quartier gnüda missa inavo dals respunsabels dal chantun Grischun – cun la pretaisa chi’s stopcha il prüm far üna planisaziun da quartier – es quella part dal cumün da Zernez restada pac interessanta, saja quai per persunas interessadas da fabrichar sco eir pel cumün svess. Uossa es l’interess da fabrichar eir in quel quartier però grond. «In quel quartier daja però amo adüna parcellas chi nun han ingün access e chi ston propcha gnir regladas in detagl», argumentescha Hohenegger. Ils pass necessaris per far il plan da quartier e da til survgnir inavo acceptà dal chantun Grischun sun perquai gnüts fats dürant quist on. Sco cha’l president cumünal declera, s’esa uossa perfin stat cuort avant il radschiundscher il böt. Sainza chi füss gnüda inoltrada l’iniziativa chi pretenda da nun inchaminar ils pass per far la planisaziun dal quartier, füss quel tenor las explicaziuns da Hohenegger uossa plü o main pront per gnir surfabrichà. Perche cha l’iniziativa cunter il plan da quartier es gnüda inoltrada güsta uossa nu’s vegna a savair. «Üna planisaziun da quartier cuosta als possessuors da terrain in quel quartier però alch e quai es tenor meis parair il motiv principal da l’iniziativa», disch il president cumünal da Zernez, René Hohenegger. Cha culla nouva planisaziun dal quartier a Zernez pudessan ils interessats chi vöglian fabrichar in quel lö nempe profitar d’avantags sco per exaimpel da pudair fabrichar plü grond co in oters lös in cumün.

Schoglier intern ils problems

Invezza d’avair pudü inoltrar la planisaziun da quartier a las instanzas superiuras dal chantun Grischun sun ils respunsabels dal cumün da Zernez uossa in trattativas culs iniziants. «Nus pudain surdar l’iniziativa al Chantun e pretender da sistir la planisaziun pretaisa dal quartier d‘abitar e mansteranza’. Cha quella pretaisa gnia in seguit però acceptada e cha’l quartier possa gnir ütilisà al maximum pussibel es plütöst impussibel co pussibel», intuna’l. Insomma: «Miraculs nu po far ingün», disch el ed appellescha a la populaziun d’avair incletta per l’agir da la suprastanza cumünala. «Nus nu pudain conceder permiss da fabrica scha nus nu vain fat nossas lezchas e survgnin l’ok da las instanzas superiuras», repeta’l e disch ch’el spera da chattar cun quellas persunas interessadas da fabrichar in quel quartier ün cumpromiss chi cuntainta a tuottas duos varts pertoccas. «Nus dal cumün eschan evidaintamaing interessats da pudair dar permiss da fabrica e vulain far quai eir il plü svelt pussibel», intuna Hohenegger. Ma cha cun pretender chosas bod impussiblas nu saja quai pussibel. Ün’ulteriura iniziativa es gnüda inoltrada in connex cun la ledscha da fabrica da Zernez e Brail. «Ma eir in quist cas eschna amo in trattativas. Nus provain da schoglier bainsvelt ils problems», imprometta René Hohenegger. Scha tuot ils sforzs da chattar soluziuns tanter pêr nu mainan ingüns früts, stuvarà, sco ch’el disch, lura decider la radunanza cumünala che vias chi dessan gnir inchaminadas in avegnir. 

Autor: ANR