Dürant la radunanza extraordinaria da delegats da la Corporaziun dals cumüns concessiunaris da las Ouvras electricas Engiadina (CCC OEE) sun gnüdas deliberadas differentas contribuziuns ad instituziuns chi vegnan finanziadas our da la chascha dals 5 pertschient dals fits d’aua. Fingià illa radunanza ordinaria dals 29 marz a Tschlin vaivan ils delegats deliberà contribuziuns per 455’000 francs. In venderdi sun gnüdas decisas ulteriuras contribuziuns per raduond 40’000 francs. Implü ha decis la radunanza extraordinaria da surtour a partir da quist’on chi vain la contribuziun annuala da la Pro Engiadina Bassa (PEB) al Center d’art contemporana Nairs da 30’000 francs. «I nun es uschè cha la Corporaziun dals cumüns concessiunaris paja in avegnir ils 30’000 francs directamaing a Nairs», ha infuormà Not Carl, il president da la CCC OEE. In cunvegna culla PEB saja gnü decis cha Nairs es plütost ün tema cultural chi suottastà al sustegn dals cumüns concessiunaris. «Perquai vaina decis da pajar la contribuziun annuala intant üsitada da la PEB per cha quella po in seguit indemnisar il Center da cultura Nairs cun quel import seguond il contrat existent da prestaziun», declera Carl. «Ils cumüns concessiunaris nu vöglian nempe surtour il contrat da prestaziun chi exista tanter la PEB e Nairs», ha argumantà Not Carl. Chi saja però evidaint pels delegats da la CCC OEE da sustgnair a Nairs e cha perquai fetschan els quai eir jent. Per la paja tratta la PEB in avegnir otras dumondas da sustegn sco per exaimpel per progets da chüra e sandà sainza cha’ls cumüns concessiunaris as stopchan confuonder cun quists temas. «Cun quista separaziun tanter cultura ed otras spartas vulain nus rablar üna tscherta transparenza illas dumondas da sustegns e na ha’ls cumüns politics, la PEB e la corporaziun ston trattar las listessas dumondas», ha conclüs Carl. Perche cha a la fin sajan tuottas trais chaschas dals cumüns.