La radunanza generala ordinaria da la società «La Vouta» ha fat bun in sonda a Lavin il rendaquint 2011/12, adonta cha quel serra giò cun üna perdita. Pro cuosts da gestiun da 52'580 francs resulta ün avanz da sortidas da 7976 francs a man da la facultà da la società. Tenor las duos manadras da «La Vouta», Anna Serarda Campell e Gianna Cadonau saja quist resultat da relativar e da tour in consideraziun, cha dürant l’on da gestiun haja gnü lö il rimplazzamaint da las forzas illa suprastanza. Cun nouv schlantsch vöglian las duos giuvnas dar pais a l’augmaint da contribuziuns finanzialas ma eir a la recrutaziun da nouvs commembers per la società. In fuorma d’ün co-presidi surpiglian Campell e Cadonau la gestiun da la società da l’anteriura presidenta Ladina Campell. Ella vaiva dat üna fatscha a «La Vouta» dürant i’ls ultims 16 ons. Fingià invià han las duos giuvnas ün nouv concept culinaric. Cun üna «bar da schoppa» paran las organisaturas d’avair chattà il gust dal public. Dürant las sairadas culturalas vegnan preparadas e vendüdas duos fin trais schoppas differentas.

Sfida organisatorica

Illas tschernas sun Anna Serarda Campell e Gianna Cadonau gnüdas confermadas in lur carica. Per Tanja Schatzmann, chi ha demischiunà sia carica, sün gnüts elets cun applaus Bettina Vital dad Ardez e Joannes Bernard Campell da Lavin illa suprastanza. Inavant ha la radunanza fat bun ün müdamaint da statüt. Quist prevezza da müdar il cumanzamaint da l’on da gestiun süls 1. avuost. Ils revisuors, Ursula Bolli e Peter Molinari, han intimà a la suprastanza in ün rapport intern, d’elavurar ün organigram e da reglar internamaing melder las cumpetenzas. Per Molinari es important, cha l’existenza da la società nu saja dependenta da la famiglia Campell. «La società sto pudair exister e funcziunar eir sainza ils Campells», ha’l circumscrit il böt.

«La gronda libertà»

L’arrandschamaint teatral satiric da la saira ha demonstrà cha «La Vouta» es sün dretta via. Üna «Vouta» plaina stachida ha bivgnantà las duos artistas Nicole Knuth ed Olga Tucek. Las vendschadras dal premi cultural «Salzburger Stier» dal 2011 han demuossà üna vouta daplü lur talent satiric agüz extraordinari. Cun chant, orgel da man, mimica divertenta e surtuot cun texts directs e suvenz eir impertinents e perfids han ellas pisserà per applaus frenetic. «Freiheit – Eine Misere in fünf Aufzügen» ha persvas in tuot ils puncts: Il muond dals dieus sül Olimp es suotsura, i regna il battibuogl. La «libertà» vain tramissa sül muond inua ch’ella tschercha a sai svessa e prova da gnir recugnuschüda dals umans. Ün’intenziun na simpla in vista dals problems multifaris chi regnan sül muond. Knuth e Tucek mainan virtuosamaing tras ün muond falomber. Ils umans mettan lur ultima spranza sün la grond’emischiun televisiva da la sonda saira, nomnada «la gronda libertà». Cha quista «show ultimativa» ha lö i’l desert da l’Eritrea dà a tuot la sceneria il rom culminant sarcastic. Las acturas interrumpan l’istorgia adüna darcheu cun spots satirics da reclama. E listess, a la fin quintan ellas ün’istorgia sur dals umans, la politica, l’economia e sur dals sömmis da minchün in möd cumpact e pizchaint.

Autur: Jon Duschletta

Fotografia: ANR/Flurin Andry