L’architect Men Duri Arquint es gnü onurà per seis proget ch’el ha realisà i’l tablà da la Chasa Plaz ad Ardez: Ils abitants da quella chasa vaivan incumbenzà a l’architect da disegnar curunas sün masüra respettond la substanza veglia da la chasa. Men Duri Arquint ha fat la proposta da nu sacrifichar ün dals spazis istorics illa chasa, dimpersè da fabrichar la biblioteca in tablà, sco construcziun ad incharn pichada sü vi da la tettaglia. La giuria dal Prix Lignum loda la valur spaziala ed architectonica cha quista intervenziun dà al tablà. La giuria ha basà il güdicat sül fat, cha l’ouvra saja gnü realisà «sainza tour davent alch da la substanza istorica da la chasa». 

La biblioteca ha survgni duos spazis, ün per depositar ils cudeschs, cun curunas vi da tuot las paraids, e l’oter per leger illa glüm chi aintra aint da la fanestra.

Autur e fotografia: anr/fa