Dora Erny da Sent ha ün’avaina artistica per il tagl da forsch. Ella ha bandunà avant 18 ons il chantun Basilea per gnir cun sia famiglia ad abitar a Sent. Quella jada vaivan Dora Erny e seis hom cumprà l’Hotel Rezia, il qual han els manà plüs ons. Hoz es l’artista guaivda ed ha intant vendü l’hotel. Uossa as dedichesch’la plainamaing a sia paschiun, il tagl da forsch.

Grond effet cun pac material

Lavuors a man han adüna interessà e fat plaschair a Dora Erny. Avant 25 ons ha l’artista fat seis prüm cuors da tagl da forsch. «A mai fascinescha adüna darcheu che effet chi’s po ragiundscher cun ün toc palperi», disch Dora Erny. Ella ha dürant tuot quists ons frequentà plüs cuors per imprender differentas tecnicas dal tagl da forsch. Seis hobi d’eira per ella dürant il temp ch’ella faiva l’hoteliera meditaziun. «Eu vaiva mia trocla cun forschs e palperi adüna in vicinanza e mincha mumaint ch’eu vaiva temp pigliaiva per mans e provaiva da realisar mias ideas», quinta l’artista. Seis purtrets pichaiv’la sü davoman illas localitats da seis hotel. «Eu vaiva adüna üna pitschna exposiziun in chasa ed uschè n’haja cumanzà eir a vender ün o tschel purtret», agiundsch’la. Cun l’ir dals ons tilla gnivan adüna daplüssas ideas ed ella ha lura creà la carta da menü per seis hotel cun tagls da forsch. «Ils giasts d’eiran inchantats da mia lavur e quai m’ha adüna darcheu motivada da cuntinuar cun nouvas ouvras», disch Dora Erny. Uossa ch’ella ha rafüdà a far l’hoteliera es seis hobi dvantà sia lavur. «Meis böt es d’organisar prosmamaing ün’exposiziun da mias lavuors e da cumanzar a dar cuors a tuot quels chi han plaschair vi da lavuors fattas a man», conclüda l’artista da Sent. 

Autor: ANR