Sco cha’l cumün da Val Müstair ha declerà in üna comunicaziun als mezs da massa, vegnan spostadas las elecziuns per üna rapreschantanta o ün rapreschantant da la fracziun da Sta. Maria i’l cussagl cumünal dal cumün da Val Müstair. Cedlas da votaziun in quel connex vegnan, sco chi sta scrit, büttadas davent e sun invalidas. Quellas elecziuns varan nempe lö als 11 november da quist on. Cedlas da la fracziun da Sta. Maria chi concernan las elecziuns per la cumischiun da fabrica, il cussagl da scoula e la cumischiun sindicatoria (GPK) vegnan però resguardadas e sun valablas.

Binkert Becchetti po candidar

Al spostamaint da las elecziuns pel rapreschantant da la fracziun da Sta. Maria esa impustüt gnü perquai cha Gabriella Binkert Becchetti, directura da la Biosfera Val Müstair, affarista ed abitanta da Sta. Maria vaiva candidà per quel post. La suprastanza cumünala vaiva però decis da nu tilla laschar candidar perquai ch’ella es in sia funcziun pro la Biosfera fingià impiegada stabla dal cumün da Val Müstair. Cunter quista decisiun vaiva Gabriella Binkert Becchetti innoltrà ün plont. Davo as avair infuormats in detagl, decleran ils respunsabels dal cumün uossa, chi tils saja capità ün discapit e cha perquai gnian spostadas las elecziuns da la fracziun da Sta. Maria in connex cun l’elecziun d’ün rapreschantant da quella fracziun i’l cumün da Val Müstair. Cha la remarcha publichada sülla glista dals candidats per quellas elecziuns ingio chi vain declerà cha Binkert Becchetti «nu po uschè candidar causa ch’ella suottastà in sia funcziun da directura da la Biosfera directamaing a la suprastanza cumünala», saja formulada in fos möd, vegna scrit. Cha tenor ledscha nu giaja quia (cun la remarcha formulada) però per il «na pudair candidar», dimpersè per «üna incumpatibiltà» tenor artichel 21 da la ledscha cumünala grischuna, obain da l’artichel 15 da la constituziun cumünala dal cumün da Val Müstair. Tenor la comunicaziun dal cumün da Val Müstair vain prosmamaing protramiss a la populaziun da Sta. Maria üna glista dals candidats pel gremi cumünal chi’d es d’occuppar. Quella glista cuntegna ils noms: Gabriella Binkert Becchetti, Hans-Jakob Pinggera e Remo Salvett. Cha tenor ledscha po mincha persuna chi ha üna «incumpatibiltà» candidar per gremis politics. Davo l’elecziun stopcha quella persuna però as decider per üna o tschella lezcha ch’ella voul surtour. In cas d’üna «incumpatibiltà» nu possa quella persuna nempe s’ingaschar in tuots duos gremis.

Autur e fotografia: ANR/Martina Fontana