Als 28 d’october sun programadas tschernas da la suprastanza e dal cussagl cumünal da Samignun. Bain pus-sibel, cha al di da las tschernas nu sun avant man ingüns candidats. Il president cumünal e manader da gestiun da las ouvras electricas (EW) da Samignun, Hans Kleinstein ha oritentà d’incuort als commembers da la Pro Engiadina Bassa (PEB) sur da seis intent, da na plü star a disposiziun per üna ulteriura perioda d’uffizi. Als 27 da settember, ün di avant l’ultim termin per s’inscriver illa glista da tscherna, ha infuorma Kleinstein alura eir a la cumischiun independenta da tscherna. In seguit ha cumanzà a Samignun ün «exodus» exemplaric. 

Andreas Hangl sorta davo dudesch ons our dal cussagl cumünal pervi da la limitaziun dal temp d’uffizi. Tuot tschels, nouv commembers dal cussagl, trais commembers da la suprastanza inclus il president ed eir ils tschinch commembers da la cumischiun sindicatoria nu’s mettan fin uossa plü a disposiziun per ün’ulteriura perioda d’uffizi. 

Reacziun da chadaina

Sco cha Hans Kleinstein ha dit sün dumonda, saja stat sia decisiun üna da radschun. Kleinstein es daspö ses ons president cumünal e maina l’ouvra electrica cun 15 impiegats. Dal 2006 ha fuormà Hans Kleinstein cun üna gruppa da cumbattants las instanzas politicas da Samignun quasi in d’ün cuolp. Quist «team» ha ils ultims ses ons podü planisar e realisar divers progets importants per Samignun. Tanter oter il center per seniors cun chüra integrada «Chalamandrin», las localitats forestalas e da pumpiers o il proget da la via tras Laret. Eir saja la nouva ledscha agrara fingià gnüda relaschada e la planisaziun locala saja pronta per la votumaziun. 

Che capita al di da las tschernas?

Werner Heis, präsident dal cussagl cumünal disch cler e net: «Eu n’ha cumanzà avant ses ons cun Hans Kleinstein a far politica – sch’el rafüda, alura rafüd eir eu». El conferma, cha per tuot ils politikers saja la decisiun da Kleinstein statta üna surpraisa. Displaschaivelmaing nu saja stat pussibel da gnir insembel e discuter in chosa. Però: «minchün es liber da far quai ch’el voul». Intrigas politicas dementeschan tuot las persunas contactadas categoricamaing.

Samignun douvra dunque üna nouva figüra cun profil directiv, sco cha Kleinstein d’eira üna. Fin hoz, e quai han confirmà ils duos commembers dal uffizi da tscherna Reto Walser e Kurt Westreicher, es però la glista dals candidats per las tschernas vöda. Scha quai as müda amo illas ultimas duos eivnas es üna dumonda chi interessa actualmaing. Ma eir, che chi capità in ün tal cas als 28 d’october. Tenor Reto Walser chi coordinescha l’uffizi da tschernas, pudess capitar, cha i’l prüm scrutin tschüffan diversas persunas vuschs, sgüra eir Hans Kleinstein. E che chi capità in seguit – in vista al seguond scrutin – quai nu sa ingün.

Autur: Jon Duschletta

fotografia: archiv EP PL