Paschiun per musica e lingua

| Mi, 21. Nov. 2012

Daspö 17 ons organisescha Leta Mosca concerts classics illa baselgia da Sent. Sco magistra ha ella collavurà pro la creaziun da differents mezs d’instrucziun, dat eir uras da musica e daspö il 1977 es ella l’organista da Sent.

«Nus ans allegrain da Tilla comunichar cha la Regenza ha decis da conceder ad Ella ün premi d’arcugnuschentscha ill’otezza da 20'000 francs per onurar Sias prestaziuns sco animatura da la vita musicala in Engiadina Bassa sco eir per Seis ingaschamaint perseverant pella lingua e cultura rumantscha. In nom da la Regenza, la presidenta Barbara Janom Steiner.» Cur cha Leta Mosca da Sent ha survgni la mità da settember quista charta d’eira ella fich surpraisa: «Eu mai nu vess spettà da survgnir ün premi, el am fa però grond plaschair impustüt perquai ch’eu bad cha mia lavur qua a Sent vain predschada.»

Nadas diversas amicizchas

Plü bod organisaiva la Società da cura da Sent ils concerts in cumün. Avant 17 ons ha la Società d’ütil public lura dumandà a Leta Mosca sch’ella nu less surtour quist’incumbenza. «Causa ch’eu vaiva fingià la respunsabiltà pels clavazins in scoula ed in chasa cumünala e per l’orgel – eu sun daspö 46 ons l’organista – d’eira bod natüral ch’eu surpiglia quista lavur», as regorda ella. Ils artists han svelt dudi da quista pussibiltà da pudair sunar illa baselgia da Sent cun sia bun’acustica. «Uschea daja adüna darcheu dumondas da fuormaziuns da differents geners musicals da pudair gnir a concertar a Sent.» Ella predscha quist contact cullas musicistas e musicists: «Id es glieud interessanta chi tuorna per part regularmaing darcheu a Sent ed id ha dat planet eir amicizchas, i’s survain vieplü cartas cun salüds ed annunzchas da naschentschas.» La lavur d’organisar es multifara: Leta Mosca ha imprais a lavurar cul computer, «la correspondenza va tuot per e-mail». Ella fa svessa ils programs, ils chalenders d’arrandschamaints, ils placats ed ils bigliets, guardond adüna cha’l rumantsch saja eir preschaint. «Sch’ün concert es in chasa cumünala esa da verer da reservar adura las localitats», manzun’la. La Società d’ütil public chi finanziescha ils concerts e las occurrenzas culturalas ha il sustegn dal cumün da Sent, dal Chantun e dad oters sponsuors, per part eir privats.

L’infanzia a Büglgrond

Leta Mosca-Gaudenz es creschüda sü a Scuol, ella d’eira il prüm uffant da Florinda Gaudenz-Sarott e Notaporta Gaudenz. Sia mamma d’eira statta avant la marida magistra da scoulina e seis bap d’eira daintist. «Insembel cun meis trais fradgliuns n’haja passantà üna bell’infanzia illa stretta cumünanza da Büglgrond», as regorda ella, «in nossa famiglia gniva bler chantà e fat musica.» Eir l’ingaschamaint pella lingua rumantscha tilla es adüna stat a cour: «Quist’amur pel rumantsch vaina survgni da noss genituors fingià d’uffants.» Seis bazegner Otto Gaudenz vaiva fundà l’Uniun dals Grischs e seis bap scrivaiva i’l temp liber vi da seis dicziunari tecnic nomnà ‘S-chet rumantsch’ ch’el ha publichà i’l Fögl Ladin. Davo la matura a Ftan ha frequentà Leta Mosca a Cuoira i’l seminari superiur e dat scoula a Dutgien/Valendau, a San Murezzan ed a Sent. In quists ons ha ella collavurà pro divers mezs per l’instrucziun da rumantsch e fat eir da mentura. Üna quarantina da seminaristas e seminarists han fat pro ella il praticum. «Quai es stat per mai alch fich important, i d’eira ün dar ed ün tour, i’s survgniva üna pruna impuls dad els», disch la magistra pensiunada, «eu n’ha gnü blerischems seminarists cun gronds duns per disegnar e pittürar ed eir per giovar teater culs uffants, uschea n’haja pudü imprender bler dad els.» Leta Mosca dà ün sguard vers l’avegnir: «Intant ch’eu sun amo buna n’haja grond plaschair da pudair cuntinuar cun quista lavur ed organisar inavant ils concerts illa baselgia a Sent. Daja insomma alch plü bel co da’s laschar inchantar da la musica chi cun sias melodias ans invida ad insömgiar e cun seis ritems ans fa la musica cuaida da ballar?» (anr/fa)

Mehr: 

Neuen Kommentar schreiben

CAPTCHA
Diese Frage soll automatisierten Spam verhindern und überprüft, ob Sie ein menschlicher Besucher sind

KOMMENDE EVENTS

STELLEN

IMMOBILIEN

DIVERSES