Alfredo Bozzolan, Samedan, 1939–2013

Do, 28. Mär. 2013

Als 21 da favrer vainsa, illa baselgia Plaz a Samedan, displaschaivelmaing stuvieu piglier cumgio per adüna dad Alfredo Bozzolan. Ün’affabla e zuond gentila persuna nun es pü traunter da nus.

Ils innumbrabels interessants e plaschaivels inscunters e las divertentas baderledas cul cher defunt ans restaron però in nos immaint e nus essans cuntaints d’avair pudieu giodair sia cumpagnia ed amicizcha.

Zieva ün sogiuorn in Ingialterra e Germania per as perfecziuner i’l mister e surtuot per imprender las linguas, es Alfredo entro al cumanzamaint dals ans sesaunta in servezzan scu camarier a l’hotel Bernina a Samedan. Ad es bain sto sieu frer, chi lavuraiva già daspö püs ans allo scu «maître d’hôtel», chi vaiva pissero per el quista plazza. Zieva il retuorn da sieu frer in patria in Italia es Alfredo alura seguieu in quella funcziun. Pü da quaraunta ans ho el pissero in möd cumplaschaivel e servizchaivel pel bainster dals giasts a l’hotel Bernina e pü tard alura a l’hotel Albana a San Murezzan. Alfredo eira cun chüerp ed orma camarier. Cun sia amiaivlezza, sieu umur – però adüna cun respet e maniera – eir’el zuond bainvis tals giasts, saja que fulasters u indigens. El vaiva ün dun tuottafat speciel da distinguer tar chenüns da sieus giasts ch’el as pudaiva praster da fer üna remarcha, ün spass u dafatta üna pitschna nardet. Cun grand’abilted passaiva el tres la sela da manger dand ün’öglieda a dretta ed a schnestra sün las maisas, scha las posedas, ils magöls e las serviettas eiran luvedas al dret lö u pigliand incunter las postaziuns u’ls giavüschs dals giasts.

Sias grandas cugnuschentschas i’l mister e sieu nöbel möd da traficher culs conumauns sun bain stos ils motivs cha Alfredo es gnieu adüna darcho ingascho scu instructur in sieu mister a la scoula d’hoteliers a Passugg u in occasiun dals cuors d’usters chi d’eiran a sieu temp auncha obligatorics sch’ün vulaiva mner ün’ustaria. Ma eir in occasiun da festiviteds in vschinauncha eira el adüna da la partitda. Eau pens cò surtuot a sieu grand ingaschamaint in occasiun da la festa da chaunt chantunela dal 1999.

Sper sieu mister al staiva sia famiglia zuond a cour. Cun granda satisfacziun e superbgia ho el perseguito cu cha sieu figl e sias duos figlias as haun verifichos illa vita, e cur ch’el quintaiva da sieus abiedis glüschivan sieus ögls dal grand plaschair. Melavita ho el memma bod stuvieu piglier cumgio da sia duonna Clara. Tar sieus iffaunts e sieus amihs ho el tschercho e chatto distracziun in sieu grand cordöli. L’esser sulet, zieva üna vita plaina da travasch, l’ho però fin a sia mort zuond chalcho. Cun grand plaschair e grand arcugnuschentscha ho el perque adüna darcho accepto gugent ün u l’oter invid da sieus amihs per üna spassageda saja que al lej da Como, giò’l Tirol dal süd u sü la Fuorcla da Livigno.

Ils grands müdamaints dals ultims ans a l’hotel Bernina l’haun do suvenz da penser. Mincha geda ch’el passaiva lo speravi a’l gniva adimmaint il temp da si’operiusited e cun ün suspir e squass dal cho as dumandaiva’l cu cha que es be sto pussibel. Be d’inrer trafichaiva el ils ultims ans auncha allo, ma scu schi füss sto ün presentimaint ho el cuort aunz ch’el ho stuvieu as render in chüra dals meidis, m’express – per me tuottafat inaspetto – il giavüsch, d’ ir insembel a manger al Bernina. Ma que nun ho pü vulieu esser. Üna vouta dapü s’ho verificho il proverbi «l’umaun propuona e Dieu dispuona».

Cher Alfredo, reposa in pêsch.

Autur: Martin Huder

Kategorie: 

KOMMENDE EVENTS

STELLEN

IMMOBILIEN

DIVERSES